ਚੰਡੀਗੜ੍ਹ,7 ਅਪ੍ਰੈਲ, Gee98 news service
-ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਵੱਲੋਂ ਜਲੰਧਰ ਹਲਕੇ ਤੋਂ ਟਿਕਟ ਮੰਗੇ ਜਾਣ ਦੀ ਚਰਚਾ ‘ਤੇ ਟਿੱਪਣੀ ਕਰਦੇ ਹੋਏ ਜਲੰਧਰ ਨਾਲ ਸਬੰਧਿਤ ਟਕਸਾਲੀ ਕਾਂਗਰਸੀ ਪਰਿਵਾਰ ਦੇ ਫਰਜੰਦ ਕਾਂਗਰਸੀ ਵਿਧਾਇਕ ਵਿਕਰਮਜੀਤ ਸਿੰਘ ਚੌਧਰੀ ਦੀ “ਲੁਤਰੋ” ਫਿਸਲ ਗਈ ਅਤੇ ਉਹਨਾਂ ਨੇ ਚੰਨੀ ਪ੍ਰਤੀ ਇੱਕ ਵੱਡੀ ਗੱਲ ਆਖ ਦਿੱਤੀ। ਲੋਕ ਸਭਾ ਹਲਕਾ ਜਲੰਧਰ ਤੋਂ ਟਿਕਟ ਮੰਗਣ ਵਾਲੇ ਕਾਂਗਰਸੀ ਵਿਧਾਇਕ ਵਿਕਰਮਜੀਤ ਸਿੰਘ ਚੌਧਰੀ ਨੇ ਕਾਂਗਰਸ ਦੇ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੂੰ ਪਾਕਿਸਤਾਨ ਦੇ ਸ਼ਹਿਰ “ਲਾਹੌਰ ਤੇ ਪਿਸ਼ੌਰ” ਨਾਲ ਜੁੜੀ ਇੱਕ ਕਹਾਵਤ ਵਿਚਲੇ ਇਤਰਾਜ਼ਯੋਗ ਸ਼ਬਦਾਂ ਦੀ ‘ਵਰਤੋਂ ਨਾ ਕਰਦੇ ਹੋਏ’ ਵੀ ਵੱਡੀ ਗੱਲ ਆਖ ਦਿੱਤੀ ਹੈ। ਭਾਵੇਂ ਕਿ ਸਿੱਧੇ ਤੌਰ ‘ਤੇ ਵਿਕਰਮਜੀਤ ਸਿੰਘ ਚੌਧਰੀ ਨੇ ‘ਲਾਹੌਰ ਤੇ ਪਿਸ਼ੌਰ’ ਵਾਲੀ ਕਹਾਵਤ ਵਿਚਲੇ ਫੁੱ** ਸ਼ਬਦ ਦੀ ਵਰਤੋਂ ਨਹੀਂ ਕੀਤੀ ਪਰ ਚੌਧਰੀ ਨੇ ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਚਰਨਜੀਤ ਸਿੰਘ ਚੰਨੀ ਦੀ ਚਮਕੌਰ ਸਾਹਿਬ ਅਤੇ ਭਦੌੜ ਹਲਕੇ ਤੋਂ ਹੋਈ ਹਾਰ ਨੂੰ ਲਾਹੌਰ ਤੇ ਪਿਸ਼ੌਰ ਦੀ ਕਹਾਵਤ ਨਾਲ ਜੋੜ ਕੇ ਅਸਿੱਧੇ ਤਰੀਕੇ ਨਾਲ ਚੰਨੀ ਲਈ ਇਹ ਸ਼ਬਦ ਕਹਿ ਹੀ ਦਿੱਤਾ ਹੈ। ਵਿਕਰਮਜੀਤ ਚੌਧਰੀ ਨੇ ਕਿਹਾ ਕਿ ਮੁੱਖ ਮੰਤਰੀ ਹੁੰਦੇ ਹੋਏ ਵੀ ਚੰਨੀ ਭਦੌੜ ਤੇ ਚਮਕੌਰ ਨਹੀਂ ਬਚਾ ਸਕੇ, ਚੰਨੀ ਜੀ ਦਾ ਫਰਜ਼ ਬਣਦਾ ਹੈ ਕਿ ਉਹ ਭਦੌੜ ਅਤੇ ਚਮਕੌਰ ਜਾ ਕੇ ਪਾਰਟੀ ਦੇ ਨੁਕਸਾਨ ਨੂੰ ਪੂਰਾ ਕਰਨ… ਜਲੰਧਰ ‘ਚ ਚੌਧਰੀ ਪਰਿਵਾਰ ਖੜਾ ਹੈ।
ਚੌਧਰੀ ਨੇ ਕਿਹਾ ਕਿ “ਉਹਨਾਂ ਦੇ ਕਾਰਨ ਗੁਆਂਢੀ ਦੇਸ਼ ਪਾਕਿਸਤਾਨ ਦੀ ਕਹਾਵਤ, ਜਿਸ ਵਿੱਚ ਲਾਹੌਰ ਤੇ ਪਿਸ਼ੌਰ ਦਾ ਜ਼ਿਕਰ ਹੈ, ਹੁਣ ਪੰਜਾਬੀ ਲਾਹੌਰ ਦੀ ਜਗ੍ਹਾ ਚਮਕੌਰ ਤੇ ਪਿਸੌਰ ਦੀ ਜਗ੍ਹਾ ਭਦੌੜ ਦਾ ਜ਼ਿਕਰ ਕਰਨ ਲੱਗੇ ਹਨ…ਚਮਕੌਰ ਤੇ ਭਦੌੜ ਤੋਂ ਹਾਰ ਕੇ ਜਲੰਧਰ ਤੋਂ ਟਿਕਟ ਮੰਗਣਾ ਜਸਟੀਫਾਈ ਨਹੀਂ ਹੈ”। ਦਰਅਸਲ, ਚਰਨਜੀਤ ਸਿੰਘ ਚੰਨੀ ਦੀ ਜਲੰਧਰ ਤੋਂ ਚੋਣ ਲੜਨ ਦੀ ਚਰਚਾ ਚੱਲ ਰਹੀ ਹੈ ਜਿਸ ਤੋਂ ਚੌਧਰੀ ਪਰਿਵਾਰ ਬਹੁਤ ਜਿਆਦਾ ਨਾਰਾਜ਼ ਹੈ ਅਤੇ ਇਹ ਨਾਰਾਜ਼ਗੀ ਵਿਕਰਮਜੀਤ ਚੌਧਰੀ ਵੱਲੋਂ ਵਰਤੇ ਸ਼ਬਦਾਂ ਵਿੱਚੋਂ ਵੀ ਝਲਕਦੀ ਹੈ। ਵਿਕਰਮਜੀਤ ਚੌਧਰੀ ਨੇ ਕਿਹਾ ਕਿ “ਚੰਨੀ ਬਹੁਤ ਵੱਡੇ ਕਲਾਕਾਰ ਹਨ ,ਉਹ ਆਪਣੇ ਭਾਸ਼ਣ ਵਿੱਚ ਅਕਸਰ ਕਹਿੰਦੇ ਹਨ ਕਿ ਕੋਈ ਕੰਮ ਨਹੀਂ ਜਿਹੜਾ ਉਹ ਨਾ ਕਰ ਸਕਦੇ ਹੋਣ, ਇਸੇ ਤਰ੍ਹਾਂ ਚੰਨੀ ਨੇ 2 ਅਪ੍ਰੈਲ ਨੂੰ ਆਪਣਾ ਜਨਮ ਦਿਨ ਬਣਾ ਕੇ ਜਲੰਧਰ ਵਾਲਾ ਕੇਕ ਕੱਟ ਦਿੱਤਾ। ਚੌਧਰੀ ਨੇ ਕਿਹਾ ਕਿ ਕਾਂਗਰਸ ਪਾਰਟੀ ਕੇਕ ਕੱਟਣ ‘ਤੇ ਟਿਕਟਾਂ ਨਹੀਂ ਦਿੰਦੀ। ਵਿਕਰਮਜੀਤ ਚੌਧਰੀ ਨੇ ਇਹ ਟਿੱਪਣੀ ਵੀ ਕੀਤੀ ਕਿ “ਅਮਰੀਕਾ ਵਿੱਚ ਚੋਣਾਂ ਹੋਣ ਵਾਲੀਆਂ ਹਨ, ਜੇਕਰ ਚਰਨਜੀਤ ਚੰਨੀ ਇੱਕ ਕੇਕ ‘ਤੇ “Channi for USA” ਲਿਖ ਕੇ ਕੇਕ ਕੱਟ ਦਿੰਦੇ ਹਨ ਤਾਂ ਚੰਨੀ ਅਮਰੀਕਾ ਦੇ ਰਾਸ਼ਟਰਪਤੀ ਨਹੀਂ ਬਣ ਜਾਣਗੇ। ਚੰਨੀ ਵੱਲੋਂ ਜਲੰਧਰ ਦੀ ਟਿਕਟ ਮੰਗੇ ਜਾਣ ਦੀ ਚਰਚਾ ਤੋਂ ਬਾਅਦ ਚੌਧਰੀ ਪਰਿਵਾਰ ਵੱਲੋਂ ਚੰਨੀ ਪ੍ਰਤੀ ਪ੍ਰਗਟ ਕੀਤੇ ਰਵੱਈਏ ਤੋਂ ਇਹ ਸਪੱਸ਼ਟ ਜਾਪਦਾ ਹੈ ਕਿ ਜੇਕਰ ਹਾਈਕਮਾਂਡ ਚੰਨੀ ਨੂੰ ਜਲੰਧਰ ਲੋਕ ਸਭਾ ਤੋਂ ਟਿਕਟ ਦੇ ਵੀ ਦਿੰਦੀ ਹੈ ਤਾਂ ਚੰਨੀ ਲਈ ਦਿੱਲੀ ਦਾ ਸਫ਼ਰ ਸੌਖਾ ਨਹੀਂ ਹੋਵੇਗਾ ਕਿਉਂਕਿ ਜਲੰਧਰ ਹਲਕੇ ਵਿੱਚ ਸਵਰਗਵਾਸੀ ਸੰਤੋਖ ਸਿੰਘ ਚੌਧਰੀ ਦੇ ਪਰਿਵਾਰ ਦਾ ਚੰਗਾ ਜਨ ਆਧਾਰ ਹੈ ਜੋ ਕਿਸੇ ਦੀਆਂ ਬੇੜੀਆਂ ਵਿੱਚ ਵੱਟੇ ਪਾਉਣ ਲਈ ਕਾਫ਼ੀ ਹੈ।
