ਚੰਡੀਗੜ੍ਹ , 5 ਅਗਸਤ-ਜਗਰਾਓਂ ਪੁਲਿਸ ਨੇ ਪਿੰਡ ਚੀਮਨਾ ਵਿਖੇ ਇਕ ਨੌਜਵਾਨ ਲੜਕੀ ਦਾ ਕਤਲ ਕਰਕੇ ਫਰਾਰ ਹੋਏ ਸਿਰਫਿਰੇ ਆਸ਼ਿਕ ਨੂੰ ਵਾਰਦਾਤ ਦੇ ਕੁੱਝ ਘੰਟਿਆਂ ਬਾਅਦ ਹੀ ਕਾਬੂ ਕਰਨ ਵਿਚ ਸਫਲਤਾ ਪ੍ਰਾਪਤ ਕੀਤੀ। ਕਾਨਫਰੰਸ ਦੌਰਾਨ ਜਾਣਕਾਰੀ ਦਿੰਦੇ ਹੋਏ ਨਵਨੀਤ ਸਿੰਘ ਬੈਂਸ, ਐਸ ਐਸ ਪੀ ਪੁਲਿਸ ਜ਼ਿਲ੍ਹਾ ਲੁਧਿਆਣਾ ਦਿਹਾਤੀ ਨੇ ਦੱਸਿਆ ਕਿ ਥਾਣਾ ਸਦਰ ਜਗਰਾਉਂ ਦੇ ਐਸ ਐਚ ਓ ਅਮਰਜੀਤ ਸਿੰਘ ਦੀ ਟੀਮ ਨੇ ਮਨਵਿੰਦਰਬੀਰ ਸਿੰਘ ਐਸਪੀ ਅਤੇ ਸਤਵਿੰਦਰ ਸਿੰਘ ਡੀਐਸਪੀ ਦੇ ਦਿਸ਼ਾ ਨਿਰਦੇਸ਼ਾਂ ਤਹਿਤ ਤਫਤੀਸ਼ ਦੇ ਤਕਨੀਕੀ ਢੰਗਾਂ ਦੀ ਵਰਤੋਂ ਕਰਦੇ ਹੋਏ ਪਿੰਡ ਚੀਮਨਾ ਵਿੱਖੇ ਇੱਕ ਲੜਕੀ ਦਾ ਕਤਲ ਕਰਕੇ ਫਰਾਰ ਹੋਏ ਕਾਤਲ ਨੂੰ ਕੁਝ ਘੰਟਿਆਂ ਵਿੱਚ ਹੀ ਕਾਬੂ ਕੀਤਾ। ਵਾਰਦਾਤ ਦੇ ਵੇਰਵੇ ਦਿੰਦੇ ਹੋਏ ਐਸਐਸਪੀ ਨੇ ਦੱਸਿਆ ਕਿ ਮ੍ਰਿਤਕ ਲੜਕੀ ਗੁਰਮਨਜੋਤ ਕੌਰ ਦੀ ਪਿੰਡ ਚੀਮਨਾ ਦੇ ਹੀ ਨੌਜਵਾਨ ਗੁਰਕੀਰਤ ਸਿੰਘ ਨਾਲ ਸਨੈਪਚੈਟ ‘ਤੇ ਤਿੰਨ ਕੁ ਸਾਲ ਪਹਿਲਾਂ ਦੋਸਤੀ ਹੋਈ ਸੀ । ਘਟਨਾ ਵਾਲੇ ਦਿਨ 3 ਅਗਸਤ ਨੂੰ ਗੁਰਕੀਰਤ ਲੜਕੀ ਦੇ ਘਰ ਗਿਆ, ਜਿੱਥੇ 15 ਕੁ ਮਿੰਟ ਦੋਵਾਂ ਦੀ ਗੱਲਬਾਤ ਹੋਈ ਅਤੇ ਇਸੇ ਦੌਰਾਨ ਦੋਵਾਂ ਦੀ ਕਿਸੇ ਗੱਲ ਤੋਂ ਬਹਿਸ ਵੀ ਹੋਈ ਤਾਂ ਗੁਰਕੀਰਤ ਨੇ ਆਪਣੇ ਨਾਲ ਲਿਆਂਦੇ ਚਾਕੂ ਨਾਲ ਗੁਰਮਨਜੋਤ ਕੌਰ ਦੀ ਗਰਦਨ ਦੇ ਅਗਲੇ ਪਾਸੇ ਵਾਰ ਕੀਤਾ ਜਿਸ ਨਾਲ ਉਹ ਧਰਤੀ ‘ਤੇ ਡਿੱਗ ਪਈ, ਦੋਸ਼ੀ ਨੇ ਉਸਦੇ ਸਰੀਰ ‘ਤੇ ਚਾਕੂ ਨਾਲ ਕਈ ਹੋਰ ਵਾਰ ਵੀ ਕੀਤੇ ਜਿਸ ਕਰਕੇ ਜ਼ਖ਼ਮਾਂ ਦੀ ਤਾਬ ਨਾ ਝੱਲਦੇ ਹੋਏ ਮੌਕੇ ‘ਤੇ ਹੀ ਮੌਤ ਹੋ ਗਈ ਅਤੇ ਦੋਸ਼ੀ ਫਰਾਰ ਹੋ ਗਿਆ । ਉਹਨਾਂ ਕਿਹਾ ਕਿ ਪੁਲਿਸ ਨੇ ਤੁਰੰਤ ਹਰਕਤ ਵਿੱਚ ਆਉਂਦੇ ਹੋਏ ਤਕਨੀਕੀ ਢੰਗਾਂ ਦੀ ਵਰਤੋਂ ਕੀਤੀ ਅਤੇ ਦੋਸ਼ੀ ਨੂੰ ਪਿੰਡ ਚੌਂਕੀਮਾਨ ਦੇ ਬੱਸ ਸਟੈਂਡ ਤੋਂ ਵਾਰਦਾਤ ਦੇ ਕੁੱਝ ਘੰਟਿਆਂ ਬਾਅਦ ਹੀ ਗ੍ਰਿਫ਼ਤਾਰ ਕੀਤਾ ਅਤੇ ਪੁੱਛਗਿੱਛ ਤੋਂ ਬਾਅਦ ਕਤਲ ਸਮੇਂ ਵਰਤਿਆ ਗਿਆ ਖ਼ੂਨ ਨਾਲ ਲਿੱਬੜਿਆ ਹੋਇਆ ਚਾਕੂ ਉਸਦੇ ਘਰੋਂ ਬਰਾਮਦ ਕਰਵਾਇਆ।
Menu
