ਚੰਡੀਗੜ੍ਹ-ਮੋਹਾਲੀ ਪੁਲਿਸ ਨੇ ਇੱਕ ਅਜਿਹੇ ਗਿਰੋਹ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਜੋ ਲੋਕਾਂ ਨੂੰ ਵਹਿਮਾਂ ਭਰਮਾਂ ਵਿੱਚ ਪਾ ਕੇ ਉਹਨਾਂ ਦੇ ਘਰ ਦਾ ਪੂਰਾ ਭੇਤ ਲੈ ਲੈਂਦੇ ਸਨ ਅਤੇ ਫਿਰ ਮੌਕਾ ਪਾਕੇ ਘਰ ‘ਚ ਚੋਰੀ ਕਰ ਲੈਂਦੇ ਸਨ । ਇਸ ਗਿਰੋਹ ਦੀ ਮੁਖੀ ਇੱਕ ਤਾਂਤਰਿਕ ਔਰਤ ਦੱਸੀ ਜਾ ਰਹੀ ਹੈ । ਜਾਣਕਾਰੀ ਦਿੰਦੇ ਹੋਏ ਏਐਸਪੀ ਡਾ.ਦਰਪਣ ਆਹਲੂਵਾਲੀਆ ਨੇ ਦੱਸਿਆ ਕਿ ਪਿੰਡ ਲਾਲੜੂ ਦੇ ਵਸਨੀਕ ਦਰਸ਼ਨ ਸਿੰਘ ਪੁੱਤਰ ਗਿਆਨ ਚੰਦ ਨੇ ਪੁਲੀਸ ਨੂੰ ਇਤਲਾਹ ਦਿੱਤੀ ਕਿ ਉਹ ਗੱਡੀਆਂ ਦਾ ਕਾਰੋਬਾਰ ਕਰਦਾ ਹੈ ਅਤੇ ਗੱਡੀਆਂ ਨਾਲ ਸਬੰਧਿਤ ਰਕਮ ਆਪਣੇ ਘਰ ਵਿੱਚ ਹੀ ਰੱਖਦਾ ਹੈ । ਪਿਛਲੇ ਦਿਨੀਂ ਉਸਨੇ ਕੁੱਝ ਰਕਮ ਆਪਣੇ ਘਰ ਦੀ ਅਲਮਾਰੀ ਵਿੱਚ ਰੱਖੀ, ਜਿਥੇ ਸੋਨੇ ਦੇ ਕੁਝ ਹੋਰ ਗਹਿਣੇ ਵੀ ਪਏ ਸਨ । ਦਰਸ਼ਨ ਸਿੰਘ ਨੇ ਦੱਸਿਆ ਕਿ ਇਸ ਦੌਰਾਨ ਉਸ ਦਾ ਪਰਿਵਾਰ ਡੇਰਾ ਸਲਾਬਤਪੁਰਾ ਵਿਖੇ ਸਤਿਸੰਗ ‘ਤੇ ਗਿਆ ਅਤੇ ਉਹ ਆਪਣੇ ਕੰਮ ‘ਤੇ ਜਾਂਦਾ ਰਿਹਾ, ਜਦ ਉਸ ਨੇ 19 ਮਈ 2023 ਨੂੰ ਪੈਸਿਆਂ ਦੀ ਲੋੜ ਵੇਲੇ ਅਲਮਾਰੀ ਖੋਲੀ ਤਾਂ ਅਲਮਾਰੀ ਵਿੱਚ ਰੱਖੇ ਹੋਏ 275000 ਰੁਪਏ ਅਤੇ ਸੋਨੇ ਦੀਆਂ 3 ਅੰਗੂਠੀਆਂ ਗਾਇਬ ਸਨ । ਪੁਲਿਸ ਨੇ ਦਰਸ਼ਨ ਸਿੰਘ ਦੇ ਬਿਆਨ ਦਰਜ ਕਰਕੇ ਉਕਤ ਮਾਮਲੇ ‘ਚ ਮੁਕੱਦਮਾ ਦਰਜ ਕੀਤਾ ਹੈ ਅਤੇ ਪੜਤਾਲ ਸ਼ੁਰੂ ਕੀਤੀ,ਪੜਤਾਲ ਦੌਰਾਨ ਪਤਾ ਲੱਗਿਆ ਕਿ ਲਾਲੜੂ ਦੀ ਵਸਨੀਕ ਇੱਕ ਤਾਂਤ੍ਰਿਕ ਔਰਤ ਕਮਲੇਸ਼ ਕੌਰ ਆਪਣੇ ਘਰੇ ਹੀ ਤੰਤਰਪੁਣੇ ਦਾ ਕੰਮ ਕਰਦੀ ਸੀ ਜਿਸ ਕੋਲ ਦਰਸ਼ਨ ਸਿੰਘ ਦੇ ਪਰਿਵਾਰ ਦਾ ਵੀ ਆਉਣਾ ਜਾਣਾ ਸੀ । ਤਾਂਤਰਿਕ ਕਮਲੇਸ਼ ਕੌਰ ਨੇ ਦਰਸ਼ਨ ਸਿੰਘ ਦੇ ਪਰਿਵਾਰਕ ਮੈਂਬਰਾਂ ਨੂੰ ਆਪਣੀ ਝੂਠੀਆਂ ਤਾਂਤਰਿਕ ਸ਼ਕਤੀਆਂ ਦਿਖਾ ਕੇ /ਡਰਾ ਧਮਕਾ ਕੇ ਉਨ੍ਹਾਂ ਦੇ ਘਰ ਦਾ ਸਾਰਾ ਭੇਦ ਲੈ ਲਿਆ ਸੀ ਅਤੇ ਫਿਰ ਮੌਕਾ ਪਾ ਕੇ ਜਦ ਦਰਸ਼ਨ ਸਿੰਘ ਦੇ ਘਰ ਕੋਈ ਨਹੀਂ ਸੀ, ਤਾਂਤ੍ਰਿਕ ਔਰਤ ਨੇ ਆਪਣੇ ਧੀ-ਜਵਾਈ ਨਾਲ ਮਿਲ ਕੇ ਦਰਸ਼ਨ ਸਿੰਘ ਦੇ ਘਰ ਚੋਰੀ ਕੀਤੀ ਅਤੇ ਅਲਮਾਰੀ ਵਿੱਚ ਰੱਖੀ ਸਾਰੀ ਨਕਦੀ ਤੇ ਸੋਨੇ ਦੀਆਂ ਅੰਗੂਠੀਆਂ ਚੋਰੀ ਕੀਤੀਆਂ । ਚੋਰੀ ਕੀਤੇ ਪੈਸੇ ਕਮਲੇਸ਼ ਕੌਰ ਅਤੇ ਉਸਦੇ ਜਵਾਈ ਵਿਸ਼ਾਲ ਨੇ ਆਪਸ ਵਿੱਚ ਵੰਡ ਲਏ ਅਤੇ ਸੋਨੇ ਦੀਆਂ ਅੰਗੂਠੀਆਂ ਕਮਲੇਸ਼ ਕੌਰ ਦੀ ਬੇਟੀ ਨਿਸ਼ਾ ਨੇ ਆਪਣੇ ਕੋਲ ਰੱਖ ਲਈਆਂ । ਪੁਲਿਸ ਨੇ ਪੜਤਾਲ ਦੌਰਾਨ ਕਮਲੇਸ਼ ਕੌਰ ਤੋਂ 126000 ਰੁਪੈ ਵੀ ਬਰਾਮਦ ਕੀਤੇ ਹਨ । ਦੋਸ਼ੀਆਂ ਨੂੰ ਅਦਾਲਤ ਵਿੱਚ ਪੇਸ਼ ਕਰ ਕੇ ਤਿੰਨ ਦਿਨ ਦਾ ਰਿਮਾਂਡ ਲਿਆ ਗਿਆ ਹੈ। ਪੁਲਿਸ ਅਨੁਸਾਰ ਰਿਮਾਂਡ ਦੌਰਾਨ ਇਸ ਤਾਂਤਰਿਕ ਗਿਰੋਹ ਦੇ ਹੋਰ ਕਾਰਨਾਮਿਆਂ ਦਾ ਖ਼ੁਲਾਸਾ ਹੋਣ ਦੀ ਵੀ ਸੰਭਾਵਨਾ ਹੈ ।
Menu
