ਚੰਡੀਗੜ੍ਹ, 2 ਜਨਵਰੀ, Gee98 news service
-ਨਗਰ ਨਿਗਮ ਜਲੰਧਰ ਦੇ ਐਸਡੀਓ ਦੇ ਸੱਤਾਧਾਰੀ ਪਾਰਟੀ ਦੇ ਇੱਕ ਚੇਅਰਮੈਨ ਦੀ ਸ਼ਹਿ ‘ਤੇ ਉਹਦੇ ਸਾਥੀ ਵੱਲੋਂ ਮਾਰੇ ਥੱਪੜ ਦੀ ਗੂੰਜ ਚੰਡੀਗੜ੍ਹ ਤੱਕ ਪੁੱਜ ਚੁੱਕੀ ਹੈ। ਉਕਤ ਘਟਨਾ ਮੰਗਲਵਾਰ ਸ਼ਾਮ ਲੱਗਭੱਗ 4 ਵਜੇ ਦੀ ਹੈ, ਜਦੋਂ ਨਗਰ ਨਿਗਮ ‘ਚ ਓਐਂਡਐੱਮ ਦੇ ਐੱਸਈ ਰਾਹੁਲ ਗਗਨੇਜਾ ਦੇ ਦਫਤਰ ‘ਚ ਪੰਜਾਬ ਸਫਾਈ ਕਰਮਚਾਰੀ ਕਮਿਸ਼ਨ ਦੇ ਚੇਅਰਮੈਨ ਚੰਦਨ ਗਰੇਵਾਲ ਦਾਖਲ ਹੋਏ ਅਤੇ ਉਨ੍ਹਾਂ ਨਾਲ 15 ਤੋਂ 20 ਮੈਂਬਰ ਵੀ ਨਾਲ ਸਨ। ਉਨ੍ਹਾਂ ਨੇ ਸਫਾਈ ਸੇਵਕਾਂ ਦੀ ਆਊਟ ਸੋਰਸ ‘ਤੇ ਭਰਤੀ, ਕੂੜੇ ਦੀ ਢੁਆਈ ਦੇ ਐਸਟੀਮੇਟ ‘ਤੇ ਇਤਰਾਜ਼ ਕੀਤਾ। ਉਸ ਵੇਲੇ ਐੱਸਈ ਗਗਨੇਜਾ ਦੇ ਦਫਤਰ ‘ਚ ਐਕਸੀਅਨ ਅਰਵਿੰਦ, ਐਕਸੀਅਨ ਸੁਖਵਿੰਦਰ ਸਿੰਘ, ਐੱਸਡੀਓ ਗਗਨ ਲੂਥਰਾ ਅਤੇ ਦੋ ਠੇਕੇਦਾਰ ਵੀ ਹਾਜ਼ਰ ਸਨ। ਇਸ ਦੌਰਾਨ ਚੰਦਨ ਗਰੇਵਾਲ ਦੀ ਗੱਲਬਾਤ ਅਧਿਕਾਰੀਆਂ ਨਾਲ ਬਹਿਸ ‘ਚ ਬਦਲ ਗਈ। ਐੱਸਡੀਓ ਗਗਨ ਲੂਥਰਾ ਨਾਲ ਕਿਸੇ ਮੁੱਦੇ ‘ਤੇ ਬਹਿਸ ਹੋ ਗਈ। ਇਸ ਦੌਰਾਨ ਦੋਸ਼ ਹੈ ਕਿ ਚੰਦਨ ਗਰੇਵਾਲ ਦੇ ਇਕ ਸਾਥੀ ਨੇ ਐੱਸਡੀਓ ਗਗਨ ਲੂਥਰਾ ਦੇ ਥੱਪਰ ਜੜ ਦਿੱਤਾ ਤੇ ਹੱਥੋਪਾਈ ਵੀ ਕੀਤੀ। ਇਸ ਦੌਰਾਨ ਐੱਸਈ ਗਗਨੇਜਾ, ਦੋਵੇਂ ਐਕਸੀਅਨਾਂ ਸੁਖਵਿੰਦਰ ਸਿੰਘ ਤੇ ਅਰਵਿੰਦ ਤੇ ਇਕ ਠੇਕੇਦਾਰ ਨਾਲ ਹੱਥਾਪਾਈ ਹੋਈ। ਇਸ ਤੋਂ ਬਾਅਦ ਬੁੱਧਵਾਰ ਸਵੇਰੇ ਜਦ ਉਕਤ ਅਧਿਕਾਰੀਆਂ ਵੱਲੋਂ ਨਗਰ ਨਿਗਮ ਦੇ ਕਮਿਸ਼ਨਰ ਗੌਤਮ ਜੈਨ ਨੂੰ ਚੇਅਰਮੈਨ ਚੰਦਨ ਗਰੇਵਾਲ ਅਤੇ ਹੋਰਾਂ ਦੇ ਖਿਲਾਫ ਕਾਰਵਾਈ ਲਈ ਸ਼ਿਕਾਇਤ ਦਿੱਤੀ ਤਾਂ ਇਸ ਸ਼ਿਕਾਇਤ ਦੀ ਭਿਣਕ ਲੱਗਣ ਤੋਂ ਬਾਅਦ ਚੇਅਰਮੈਨ ਚੰਦਨ ਗਰੇਵਾਲ ਅਤੇ ਉਸਦੇ ਸਾਥੀ ਕਮਿਸ਼ਨਰ ਦੇ ਦਫਤਰ ਪੁੱਜੇ ਅਤੇ ਕਮਿਸ਼ਨਰ ਨਾਲ ਵੀ ਮਾੜਾ ਵਿਵਹਾਰ ਅਤੇ ਮੰਦੀ ਭਾਸ਼ਾ ਦੀ ਵਰਤੋਂ ਕੀਤੀ। ਨਗਰ ਨਿਗਮ ਦੇ ਕਮਿਸ਼ਨਰ ਗੌਤਮ ਜੈਨ ਦਾ ਕਹਿਣਾ ਹੈ ਕਿ ਨਿਗਮ ਅਧਿਕਾਰੀਆਂ ਨਾਲ ਹੋਈ ਮਾਰਕੁੱਟ ਤੇ ਚੰਦਨ ਗਰੇਵਾਲ ਵੱਲੋਂ ਇਤਰਾਜ਼ਯੋਗ ਭਾਸ਼ਾ ਦੀ ਵਰਤੋਂ ਕਰਨ ਦਾ ਮਾਮਲਾ ਸਥਾਨਕ ਸਰਕਾਰਾਂ ਮੰਤਰੀ ਡਾ. ਰਵਜੋਤ ਸਿੰਘ ਕੋਲ ਉਠਾਉਣਗੇ। ਦੂਜੇ ਪਾਸੇ ਚਰਚਾ ਇਹ ਵੀ ਹੋ ਰਹੀ ਹੈ ਕਿ ਸੱਤਾਧਾਰੀ ਪਾਰਟੀ ਦੇ ਇੱਕ ਚੇਅਰਮੈਨ ਤੇ ਉਸਦੇ ਸਾਥੀਆਂ ਵੱਲੋਂ ਅਧਿਕਾਰੀਆਂ ਨਾਲ ਕੀਤੀ ਮਾਰਕੁੱਟ ਅਤੇ ਨਗਰ ਨਿਗਮ ਦੇ ਕਮਿਸ਼ਨਰ ਨਾਲ ਕੀਤੇ ਮਾੜੇ ਵਿਵਹਾਰ ਦਾ ਇਹ ਮਾਮਲਾ ਪਹਿਲਾਂ ਹੀ ਸਰਕਾਰ ਕੋਲ ਪੁੱਜ ਚੁੱਕਾ ਹੈ ਅਤੇ ਜਲੰਧਰ ਨਗਰ ਨਿਗਮ ਦੇ ਪ੍ਰਧਾਨ ਦੀ ਤਾਜਪੋਸ਼ੀ ਦੇ ਮੱਦੇਨਜ਼ਰ ਇਸ ਨੂੰ ਦਬਾਉਣ ਦੇ ਯਤਨ ਵੀ ਸ਼ੁਰੂ ਹੋ ਗਏ ਹਨ।
