ਬਰਨਾਲਾ,18 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-ਹਨੀਟ੍ਰੈਪ ਗੈਂਗ ਦੀ ਮੈਂਬਰ ਬਰਨਾਲੇ ਦੀ ਇੱਕ ਕੁੜੀ ਨੇ ਫਿਰੋਜ਼ਪੁਰ ਦੇ ਫੌਜੀ ਨੂੰ ਆਪਣੇ ਜਾਲ ‘ਚ ਫਸਾ ਕੇ ਪੰਜਵੀਂ ਸ਼ਾਦੀ ਕਰਵਾ ਲਈ। ਹਨੀਟ੍ਰੈਪ ਦੀ ਇਸ ਸੁੰਦਰੀ ਦੇ ਪਹਿਲੇ ਚਾਰ ਵਿਆਹਾਂ ਦਾ ਖੁਲਾਸਾ ਹੋਣ ਤੋਂ ਬਾਅਦ ਫੌਜੀ ਨੇ ਪੁਲਿਸ ਕੋਲ ਸ਼ਿਕਾਇਤ ਕੀਤੀ। ਫਿਰੋਜ਼ਪੁਰ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਫੌਜੀ ਨੇ ਲਿਖਿਆ ਕਿ ਉਹ ਬਠਿੰਡਾ ਦੀ ਛਾਉਣੀ ਵਿੱਚ ਤਾਇਨਾਤ ਹੈ। ਬਰਨਾਲਾ ਜ਼ਿਲ੍ਹੇ ਦੇ ਹੰਡਿਆਇਆ ਦੀ ਰਹਿਣ ਵਾਲੀ ਹਰਮਨਦੀਪ ਕੌਰ ਨਾਲ ਉਸਦੀ ਇੰਟਰਨੈਟ ‘ਤੇ ਦੋਸਤੀ ਹੋ ਗਈ। ਹਰਮਨਦੀਪ ਕੌਰ ਨੇ ਉਸ ਨੂੰ ਕਿਹਾ ਕਿ ਉਹ ਕੁਆਰੀ ਹੈ ਅਤੇ ਮਲੇਸ਼ੀਆ ਵਿੱਚ ਰਹਿੰਦੀ ਹੈ। ਫੌਜੀ ਨੇ ਦੱਸਿਆ ਕਿ ਹੌਲੀ-ਹੌਲੀ ਉਹਨਾਂ ਦੀ ਇਹ ਦੋਸਤੀ ਪ੍ਰੇਮ ਸੰਬੰਧਾਂ ਵਿੱਚ ਬਦਲ ਗਈ। ਇਸ ਦੌਰਾਨ ਉਸਨੇ ਹਰਮਨਦੀਪ ਕੌਰ ਨੂੰ ਕਾਫੀ ਮਹਿੰਗਾ ਘਰੇਲੂ ਸਮਾਨ ਖਰੀਦ ਕੇ ਗਿਫ਼ਟ ਵਜੋਂ ਦਿੱਤਾ। ਫੌਜੀ ਨੇ ਦੱਸਿਆ ਕਿ ਜਦ ਉਹ ਜਨਵਰੀ 2021 ਵਿੱਚ ਛੁੱਟੀ ਆਇਆ ਤਾਂ ਹਰਮਨਦੀਪ ਕੌਰ ਨੇ ਉਸ ਨੂੰ ਮਿਲਣ ਲਈ ਬੁਲਾਇਆ। ਫੌਜੀ ਜਦ ਹਰਮਨਦੀਪ ਨੂੰ ਮਿਲਣ ਲਈ ਆਇਆ ਤਾਂ ਹਰਮਨਦੀਪ ਨੇ ਗੁਰਦੇਵ ਕੌਰ ਨਾਮ ਦੀ ਇੱਕ ਮਹਿਲਾ ਨੂੰ ਆਪਣੀ ਮਾਂ ਬਣਾ ਕੇ ਉਸ ਦੇ ਨਾਲ ਮਿਲਾਇਆ ਅਤੇ ਸੋਨੀਆ ਨਾਮ ਦੀ ਇੱਕ ਕੁੜੀ ਨੂੰ ਆਪਣੀ ਮਾਸੀ ਦੀ ਲੜਕੀ, ਤਰਨਜੀਤ ਸਿੰਘ ਨੂੰ ਆਪਣਾ ਭਰਾ ਅਤੇ ਸੰਦੀਪ ਕੌਰ ਨੂੰ ਆਪਣੀ ਸਹੇਲੀ ਦੇ ਰੂਪ ਵਿੱਚ ਮਿਲਾਇਆ। ਇਹਨਾਂ ਸਾਰਿਆਂ ਨੇ ਉਸ ਨੂੰ ਭਰੋਸਾ ਦਿੱਤਾ ਕਿ ਹਰਮਨਦੀਪ ਅਜੇ ਕੁਆਰੀ ਹੀ ਹੈ ਇਹਨਾਂ ਸਾਰਿਆਂ ਦੇ ਝਾਂਸੇ ਵਿੱਚ ਆ ਕੇ ਉਸਨੇ ਫਰਵਰੀ 2021 ਵਿੱਚ ਫਿਰੋਜ਼ਪੁਰ ਦੀ ਚੁੰਗੀ ਨੰਬਰ 8 ਦੇ ਨੇੜੇ ਇੱਕ ਗੁਰਦੁਆਰੇ ਵਿੱਚ ਹਰਮਨਦੀਪ ਕੌਰ ਨਾਲ ਵਿਆਹ ਕਰਵਾ ਲਿਆ ਪ੍ਰੰਤੂ ਇਸ ਤੋਂ ਬਾਅਦ ਉਸ ਨੂੰ ਪਤਾ ਲੱਗਿਆ ਕਿ ਹਰਮਨਦੀਪ ਕੌਰ ਦੇ ਨਾਲ ਇੱਕ ਪੂਰਾ ਗਿਰੋਹ ਹੈ ਜੋ ਭੋਲੇ ਭਾਲੇ ਲੋਕਾਂ ਨੂੰ ਆਪਣੇ ਜਾਲ ਵਿੱਚ ਫਸਾ ਕੇ ਵਿਆਹ ਕਰਵਾ ਕੇ ਠੱਗੀਆਂ ਮਾਰਦਾ ਹੈ। ਫੌਜੀ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਹਰਮਨਦੀਪ ਕੌਰ ਇਸ ਤੋਂ ਪਹਿਲਾਂ ਵੀ ਚਾਰ ਵਿਆਹ ਕਰਵਾ ਕੇ ਚਾਰ ਹੋਰ ਪਰਿਵਾਰਾਂ ਨੂੰ ਠੱਗ ਚੁੱਕੀ ਹੈ। ਹਨੀਟ੍ਰੈਪ ਦੇ ਉਕਤ ਮਾਮਲੇ ਵਿੱਚ ਫੌਜੀ ਵੱਲੋਂ ਦਿੱਤੀ ਸ਼ਿਕਾਇਤ ਸਬੰਧੀ ਥਾਣਾ ਕੁਲਗੜੀ ਦੇ ਏਐਸਆਈ ਜੋਰਾ ਸਿੰਘ ਨੇ ਦੱਸਿਆ ਕਿ ਸ਼ਿਕਾਇਤ ਦੀ ਜਾਂਚ ਤੋਂ ਬਾਅਦ ਦੋਸ਼ ਸਹੀ ਪਾਏ ਗਏ ਹਨ ਜਿਸ ਤੋਂ ਬਾਅਦ ਉਕਤ ਹਰਮਨਦੀਪ ਕੌਰ, ਗੁਰਦੇਵ ਕੌਰ, ਸੋਨੀਆ, ਤਰਨਜੀਤ ਸਿੰਘ ਅਤੇ ਸੰਦੀਪ ਕੌਰ ਦੇ ਖ਼ਿਲਾਫ਼ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਜਾਂਚ ਅਫਸਰ ਨੇ ਦੱਸਿਆ ਕਿ ਪੁਲਿਸ ਇਸ ਗਿਰੋਹ ਦੇ ਮੈਂਬਰਾਂ ਦੀ ਤਲਾਸ਼ ਕਰ ਰਹੀ ਹੈ ਤੇ ਜਲਦੀ ਹੀ ਇਹਨਾਂ ਨੂੰ ਕਾਬੂ ਕਰ ਲਿਆ ਜਾਵੇਗਾ।
Menu
