ਚੰਡੀਗੜ੍ਹ,17 ਦਸੰਬਰ-ਸ਼ਰਾਬ ਦੇ ਨਸ਼ੇ ਵਿੱਚ ਟੱਲੀ ਇੱਕ ਡੀਐਸਪੀ ਨੇ ਕਿਸੇ ਵਿਅਕਤੀ ਨਾਲ ਗੱਡੀ ਪਾਰਕਿੰਗ ਕਰਨ ਦੇ ਮਾਮਲੇ ‘ਚ ਹੋਏ ਮਮੂਲੀ ਵਿਵਾਦ ਤੋਂ ਬਾਅਦ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਨਾਲ ਮੌਕੇ ‘ਤੇ ਅਫ਼ਰਾ ਤਫਰੀ ਮੱਚ ਗਈ। ਮੌਕੇ ‘ਤੇ ਇਕੱਠੇ ਹੋਏ ਲੋਕਾਂ ਨੇ ਡੀਐਸਪੀ ਦਾ ਰਿਵਾਲਵਰ ਕਬਜ਼ੇ ਵਿੱਚ ਲੈ ਕੇ ਉਸਦੀ ਚੰਗੀ ਭੁਗਤ ਸਵਾਰੀ। ਇਹ ਘਟਨਾ ਸ਼ਨੀਵਾਰ ਦੇਰ ਰਾਤ ਦੀ ਹੈ ਜਦੋਂ ਪੀਏਪੀ ਜਲੰਧਰ ਵਿਖੇ ਤਾਇਨਾਤ ਇੱਕ ਡੀਐਸਪੀ ਮਕਸੂਦਾਂ ਖੇਤਰ ਦੇ ਪਿੰਡ ਬਸਤੀ ਇਬਰਾਹੀਮ ਖਾਂ ਦੇ ਸਰਪੰਚ ਭੁਪਿੰਦਰ ਸਿੰਘ ਗਿੱਲ ਕੋਲ ਆਇਆ ਹੋਇਆ ਸੀ । ਸਰਪੰਚ ਅਤੇ ਡੀਐਸਪੀ ਦੋਵੇਂ ਜਣੇ ਇੱਕ ਪਾਰਕਿੰਗ ਦੇ ਗੇਟ ਅੱਗੇ ਡੀਐਸਪੀ ਦੀ ਗੱਡੀ ਲਗਾ ਕੇ ਸ਼ਰਾਬ ਪੀ ਰਹੇ ਸਨ। ਇਸ ਦੌਰਾਨ ਗੁਰਜੋਤ ਸਿੰਘ ਨਾਮ ਦਾ ਇੱਕ ਵਿਅਕਤੀ ਆਪਣੀ ਗੱਡੀ ਲੈ ਕੇ ਆਇਆ ਜਿਸ ਨੇ ਗੱਡੀ ਉਕਤ ਪਾਰਕਿੰਗ ਵਿੱਚ ਲਗਾਉਣੀ ਸੀ ਤੇ ਉਸਨੇ ਡੀਐਸਪੀ ਨੂੰ ਪਾਰਕਿੰਗ ਦੇ ਗੇਟ ਤੋਂ ਆਪਣੀ ਗੱਡੀ ਸਾਈਡ ‘ਤੇ ਕਰਨ ਲਈ ਕਿਹਾ। ਇਸ ਦੌਰਾਨ ਉਕਤ ਗੁਰਜੋਤ ਸਿੰਘ ਅਤੇ ਡੀਐਸਪੀ ਦੀ ਆਪਸ ਵਿੱਚ ਤੂੰ-ਤੂੰ, ਮੈਂ-ਮੈਂ ਹੋਈ ਜਿਸ ਤੋਂ ਬਾਅਦ ਡੀਐਸਪੀ ਨੇ ਆਪਣਾ ਰਿਵਾਲਵਰ ਕੱਢ ਕੇ ਫਾਇਰਿੰਗ ਕਰ ਦਿੱਤੀ। ਗੁਰਜੋਤ ਸਿੰਘ ਅਨੁਸਾਰ ਡੀਐਸਪੀ ਨੇ ਦੋ ਫਾਇਰ ਸਿੱਧੇ ਉਸ ਉੱਪਰ ਕੀਤੇ ਪਰ ਉਹ ਕਿਸੇ ਤਰੀਕੇ ਨਾਲ ਬਚ ਗਿਆ ਅਤੇ ਦੋ ਹਵਾਈ ਫਾਇਰ ਕੀਤੇ। ਪਿੰਡ ਵਿੱਚ ਫਾਇਰਿੰਗ ਹੋਣ ਤੋਂ ਬਾਅਦ ਅਫਰਾ ਤਫਰੀ ਮੱਚ ਗਈ ਅਤੇ ਮੌਕੇ ‘ਤੇ ਪਿੰਡ ਵਾਸੀ ਕਾਫੀ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋਏ, ਜਿਨਾਂ ਵਿੱਚੋਂ ਕੁਝ ਲੋਕਾਂ ਨੇ ਮੌਕੇ ‘ਤੇ ਡੀਐਸਪੀ ਦਾ ਰਿਵਾਲਵਰ ਆਪਣੇ ਕਬਜ਼ੇ ਵਿੱਚ ਲਿਆ ਤੇ ਡੀਐਸਪੀ ਦੀ ਚੰਗੀ ਕੁੱਟਮਾਰ ਵੀ ਕੀਤੀ। ਪਿੰਡ ਦੇ ਲੋਕਾਂ ਦੇ ਤੇਵਰ ਵੇਖ ਕੇ ਪਿੰਡ ਦਾ ਸਰਪੰਚ ਮੌਕੇ ਤੋਂ ਫਰਾਰ ਹੋ ਗਿਆ ਅਤੇ ਲੋਕਾਂ ਨੇ ਡੀਐਸਪੀ ਨੂੰ ਪੁਲਿਸ ਹਵਾਲੇ ਕਰ ਦਿੱਤਾ। ਮੌਕੇ ‘ਤੇ ਹਾਜ਼ਰ ਕਿਸੇ ਵਿਅਕਤੀ ਵੱਲੋਂ ਇਸ ਸਮੁੱਚੇ ਘਟਨਾਕ੍ਰਮ ਦੀ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ‘ਤੇ ਵੀ ਵਾਇਰਲ ਕੀਤੀ ਗਈ ਇਸ ਵੀਡੀਓ ਵਿੱਚ ਡੀਐਸਪੀ ਆਪਣਾ ਰਿਵਾਲਵਰ ਕੱਢਦਾ ਸਾਫ਼ ਨਜ਼ਰ ਆ ਰਿਹਾ ਹੈ। ਘਟਨਾ ਸਥਾਨ ‘ਤੇ ਪੁੱਜੀ ਪੁਲਿਸ ਪਾਰਟੀ ਨੇ ਡੀਐਸਪੀ ਦਾ ਰਿਵਾਲਵਰ ਆਪਣੇ ਕਬਜ਼ੇ ਵਿੱਚ ਲਿਆ ਤੇ ਮੌਕੇ ਤੋਂ ਖਾਲੀ ਕਾਰਤੂਸ ਵੀ ਬਰਾਮਦ ਕੀਤੇ। ਪੁਲਿਸ ਅਨੁਸਾਰ ਇਸ ਮਾਮਲੇ ਦੀ ਰਿਪੋਰਟ ਬਣਾ ਕੇ ਪੀਏਪੀ ਅਧਿਕਾਰੀਆਂ ਨੂੰ ਵੀ ਭੇਜੀ ਜਾਵੇਗੀ ਅਤੇ ਇਹ ਵੀ ਪਤਾ ਕੀਤਾ ਜਾਵੇਗਾ ਕਿ ਡੀਐਸਪੀ ਵੱਲੋਂ ਫਾਇਰਿੰਗ ਲਈ ਵਰਤਿਆ ਗਿਆ ਰਿਵਾਲਵਰ ਸਰਕਾਰੀ ਸੀ ਜਾਂ ਉਸ ਦਾ ਆਪਣਾ ਸੀ। ਸੂਤਰਾਂ ਅਨੁਸਾਰ ਪੀਏਪੀ ਦੀ ਰਿਪੋਰਟ ਦੇ ਅਧਾਰ ‘ਤੇ ਉਕਤ ਡੀਐਸਪੀ ਸਸਪੈਂਡ ਵੀ ਹੋ ਸਕਦਾ ਹੈ । ਮੌਕੇ ‘ਤੇ ਪੁੱਜੀ ਪੁਲਿਸ ਪਾਰਟੀ ਭਾਵੇਂ ਡੀਐਸਪੀ ਨੂੰ ਆਪਣੇ ਨਾਲ ਲੈ ਗਈ ਪ੍ਰੰਤੂ ਕਿਸੇ ਵੀ ਅਧਿਕਾਰੀ ਨੇ ਉਸ ਦੀ ਗ੍ਰਿਫ਼ਤਾਰੀ ਦੀ ਪੁਸ਼ਟੀ ਨਹੀਂ ਕੀਤੀ।
Menu
