ਬਰਨਾਲਾ, 14 ਸਤੰਬਰ (ਨਿਰਮਲ ਸਿੰਘ ਪੰਡੋਰੀ) :
ਪੰਜਾਬੀ ਫਿਲਮ ਇੰਡਸਟਰੀ ਨੂੰ ‘‘ਜੋਰਾ ਦਸ ਨੰਬਰੀਆ’’ ਵਰਗੀ ਦਮਦਾਰ ਫਿਲਮ ਦੇਣ ਵਾਲੇ ਪੋ੍ਰਡਿਊਸਰ/ਲੇਖਕ ਅਮਰਦੀਪ ਗਿੱਲ ਇੱਕ ਵੈੱਬਸੀਰੀਜ਼ ਲੈ ਕੇ ਆ ਰਹੇ ਹਨ। ਬਰਨਾਲਾ ਵਿਖੇ ਨਾਨਕਸਰ ਠਾਠ ਦੇ ਸਾਹਮਣੇ ਸਰਬ ਓਵਰਸੀਰੀਜ਼ ਵਿਖੇ ਆਪਣੀ ਵੈੱਬਸੀਰੀਜ਼ ‘‘ਦਾਰੋ’’ ਬਾਰੇ ਦੱਸਦੇ ਹੋਏ ਅਮਰਦੀਪ ਗਿੱਲ ਨੇ ਕਿਹਾ ਕਿ ‘‘ਦਾਰੋ’’ ਇੱਕ ਅਜਿਹੀ ਸੰਘਰਸ਼ਸ਼ੀਲ ਔਰਤ ਦੀ ਕਹਾਣੀ ਹੈ ਜਿਹੜੀ ਔਰਤ ਵਰਗ ਉੱਪਰ ਵਰਿਆਂ ਤੋਂ ਲੱਗੀਆਂ ਪੇਸ਼ੇਵਰ ਪਾਬੰਦੀਆਂ ਨੂੰ ਤੋੜ ਕੇ ਕੰਮ ਕਰਦੀ ਹੈ। ਉਨ੍ਹਾਂ ਕਿਹਾ ਕਿ ‘‘ਦਾਰੋ’’ ਦੀ ਜ਼ਿਆਦਾ ਸ਼ੂਟਿੰਗ ਬਠਿੰਡਾ ਵਿਖੇ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਪਹਿਲਾਂ ‘‘ਦਾਰੋ’’ ਵੈੱਬਸ਼ੀਰੀਜ਼ ਦੇ ਪੂਰੇ 8 ਐਪੀਸੋਡ ਦਾ ਇੱਕ ਸੀਜ਼ਨ ਦਰਸ਼ਕਾਂ ਲਈ ਲੈ ਕੇ ਆਵਾਂਗੇ ਅਤੇ ਉਸ ਤੋਂ ਬਾਅਦ ਉਸ ਦਾ ਅਗਲਾ ਸੀਜ਼ਨ ਵੀ ਤਿਆਰ ਕਰਾਂਗੇ। ਅਮਰਦੀਪ ਗਿੱਲ ਨੇ ‘‘ਦਾਰੋ’’ ਲਈ ਕੰਮ ਕਰਨ ਦੇ ਚਾਹਵਾਨ ਨਵੇਂ ਅਦਾਕਾਰ ਮੁੰਡੇ ਕੁੜੀਆਂ ਦਾ ਆਡੀਸ਼ਨ ਵੀ ਲਿਆ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੇ ਆਪਣੀਆਂ ਹੁਣ ਤੱਕ ਬਣੀਆਂ ਤਿੰਨ ਵੱਡੀਆਂ ਫਿਲਮਾਂ ਵਿੱਚ ਨਵੇਂ ਮੁੰਡੇ ਕੁੜੀਆਂ ਨੂੰ ਜ਼ਿਆਦਾ ਕੰਮ ਦਿੱਤਾ ਹੈ। ਇਸ ਮੌਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਅਮਰਦੀਪ ਗਿੱਲ ਨੇ ਕਿਹਾ ਕਿ ਪੰਜਾਬੀ ਸਿਨੇਮਾ ਦਾ ਬੱਜਟ ਬਹੁਤ ਵੱਧਦਾ ਜਾ ਰਿਹਾ ਹੈ ਅਤੇ ਵੱਡੇ-ਵੱਡੇ ਮਲਟੀਪਲੈਕਸ, ਪੀਵੀਆਰ ਅਤੇ ਵੱਡੇ ਸਿਨੇਮਾਂ ਘਰਾਂ ’ਚ ਲੱਗ ਰਹੀਆਂ ਪੰਜਾਬੀ ਫਿਲਮਾਂ ਦੇਖਣ ਲਈ ਇੱਕ ਪਰਿਵਾਰ ਨੂੰ ਹਜ਼ਾਰਾਂ ਰੁਪਏ ਖ਼ਰਚ ਕਰਨੇ ਪੈ ਰਹੇ ਹਨ ਜਿਸ ਕਰਕੇ ਲੋਕਾਂ ਦਾ ਰੁਝਾਨ ਸੋਸ਼ਲ ਮੀਡੀਆ ਪਲੇਟਫਾਰਮ ਵੱਲ ਜ਼ਿਆਦਾ ਹੋ ਰਿਹਾ ਹੈ ਅਤੇ ਪਿਛਲੇ ਕੁਝ ਸਮੇਂ ਤੋਂ ਬਣ ਰਹੀਆਂ ਵੈੱਬਸ਼ੀਰੀਜ਼ ਸਫਲਤਾ ਦੇ ਝੰਡੇ ਗੱਡ ਰਹੀਆਂ ਹਨ। ਅਮਰਦੀਪ ਗਿੱਲ ਨੇ ਪੰਜਾਬ ’ਚ ਪੰਜਾਬੀ ਫਿਲਮਾਂ ਦੇ ਵੱਡੇ ਬੱਜਟ ਬਾਰੇ ਦਿਲਚਸਪ ਤੱਥ ਸਾਂਝਾ ਕਰਦੇ ਹੋਏ ਕਿਹਾ ਕਿ ਵਿਦੇਸ਼ਾਂ ਦੇ ਵਿੱਚ ਬਣਨ ਵਾਲੀਆਂ ਪੰਜਾਬੀ ਫਿਲਮਾਂ ਨੂੰ ਉੱਥੋ ਦੀਆਂ ਸਰਕਾਰਾਂ ਵੱਡੀ ਸਬਸਿਡੀ ਦਿੰਦੀਆਂ ਹਨ ਪ੍ਰੰਤੂ ਏਧਰ ਪੰਜਾਬੀ ਸਿਨੇਮੇ ਲਈ ਕੁਝ ਨਹੀਂ ਕੀਤਾ ਜਾ ਰਿਹਾ । ਇਸ ਮੌਕੇ ਵੈੱਬਸ਼ੀਰੀਜ਼ ‘‘ਦਾਰੋ’’ ਦਾ ਪੋਸਟਰ ਵੀ ਰਿਲੀਜ ਕੀਤਾ ਗਿਆ। ਇਸ ਮੌਕੇ ਐਮਡੀ ਜਤਿੰਦਰਜੀਤ ਵੀ ਹਾਜ਼ਰ ਸਨ।
ਸਬੰਧਤ ਖਬਰ
