ਚੰਡੀਗੜ, 12 ਸਤੰਬਰ (ਜੀ98 ਨਿਊਜ਼ ਸਰਵਿਸ) :
ਵੱਡਾ ਅਫ਼ਸਰ ਬਣਨ ਲਈ ਕਈ ਵਾਰ ਪ੍ਰੀਖਿਆ ਦਿੱਤੀ ਪਰ ਕਾਮਯਾਬੀ ਨਾ ਮਿਲੀ ਤਾਂ ਇੱਕ ਮਹਿਲਾ ਨੇ ਜਾਅਲੀ ਵੱਡਾ ਅਫ਼ਸਰ ਬਣ ਕੇ ਲੋਕਾਂ ਨਾਲ ਨੌਕਰੀ ਦਿਵਾਉਣ ਦੇ ਨਾ ਤੇ ਠੱਗੀਆਂ ਮਾਰਨੀਆਂ ਸ਼ੁਰੂ ਕਰ ਦਿੱਤੀਆਂ । ਇਹ ਮਾਮਲਾ ਇੰਦੋਰ ਨਾਲ ਸੰਬੰਧਿਤ ਹੈ ਜਿੱਥੋ ਦੀ ਨੀਲਮ ਪਰਾਸ਼ਰ ਨਾਮ ਦੀ ਇੱਕ ਔਰਤ ਨੇ ਅਫ਼ਸਰ ਬਣਨ ਲਈ ਕਈ ਲਿਖਤੀ ਪ੍ਰੀਖਿਆਵਾਂ ਦਿੱਤੀਆਂ ਪ੍ਰੰਤੂ ਜਦ ਕਾਮਯਾਬੀ ਨਾ ਮਿਲੀ ਤਾਂ ਉਸ ਨੇ ਨਕਲੀ ਐਸਡੀਐਮ ਬਣ ਕੇ ਭੋਲੇ-ਭਾਲੇ ਲੋਕਾਂ ਨੂੰ ਲੁੱਟਣਾ ਸ਼ੁਰੂ ਕਰ ਦਿੱਤਾ। ਲੋਕਾਂ ’ਚ ਆਪਣਾ ਰੋਹਬ ਦਿਖਾਉਣ ਲਈ ਔਰਤ ਨੇ ਗੱਡੀ ’ਤੇ ਵੱਡੇ ਅੱਖਰਾਂ ਵਿੱਚ ਮੱਧ ਪ੍ਰਦੇਸ਼ ਲਿਖਿਆ, ਇੱਕ ਬੰਦੇ ਨੂੰ 200 ਰੁਪਏ ਦਿਹਾੜੀ ’ਤੇ ਸੁਰੱਖਿਆ ਗਾਰਡ ਰੱਖ ਕੇ ਪੁਲਿਸ ਦੀ ਵਰਦੀ ਪਹਿਨਾਈ ਅਤੇ ਉਸ ਦੀ ਕਮਰ ’ਤੇ ਖਿਡਾਉਣਾ ਪਿਸਤੌਲ ਲਟਕਾ ਦਿੱਤਾ। ਨੀਲਮ ਪਰਾਸ਼ਰ ਨੂੰ ਆਮ ਲੋਕ ਅਸਲੀ ਐਸਡੀਐਮ ਹੀ ਸਮਝਦੇ ਰਹੇ ਪ੍ਰੰਤੂ ਇਸ ਨਕਲੀ ਐਸਡੀਐਮ ਨੇ 100 ਤੋਂ ਵੱਧ ਲੋਕਾਂ ਨੂੰ ਨੌਕਰੀ ਦੇ ਨਾਂ ’ਤੇ ਕਰੋੜਾਂ ਰੁਪਏ ਦੀ ਠੱਗੀ ਮਾਰੀ। ਇਹ ਨਕਲੀ ਐਸਡੀਐਮ ਉਸ ਵੇਲੇ ਫੜੀ ਗਈ ਜਦ ਇਸ ਦੀ ਠੱਗੀ ਦਾ ਸ਼ਿਕਾਰ ਹੋਇਆ ਇੱਕ ਵਿਅਕਤੀ ਨੌਕਰੀ ਵਾਲੇ ਜਾਅਲੀ ਕਾਗਜ਼ ਲੈ ਕੇ ਇੰਦੋਰ ਕੁਲੈਕਟਰ ਦਫ਼ਤਰ ਜੁਆਇਨ ਕਰਨ ਲਈ ਪੁੱਜਿਆ। ਇਨਾਂ ਕਾਗਜ਼ਾਂ ਦੀ ਪੜਤਾਲ ਦੌਰਾਨ ਨਕਲੀ ਮਹਿਲਾ ਐਸਡੀਐਮ ਦਾ ਗੋਰਖਧੰਦਾ ਸਾਹਮਣੇ ਆਇਆ ਜਿਸ ਤੋਂ ਬਾਅਦ ਕਰਾਈਮ ਬਰਾਂਚ ਨੇ ਨਕਲੀ ਐਸਡੀਐਮ ਮਹਿਲਾ ਨੂੰ ਗਿ੍ਫਤਾਰ ਕੀਤਾ। ਇੰਦੋਰ ਦੇ ਪੁਲਿਸ ਕਮਿਸ਼ਨਰ ਹਰੀਨਰਾਇਣ ਮਿਸ਼ਰਾ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਨਕਲੀ ਐਸਡੀਐਮ ਬਣੀ ਮਹਿਲਾ ਦੇ ਘਰ ਸਰਚ ਵਰੰਟ ਲੈ ਕੇ ਤਲਾਸ਼ੀ ਲਈ ਜਾਵੇਗੀ ਜਿੱਥੋ ਸਰਕਾਰੀ ਦਸਤਾਵੇਜ਼ , ਮੋਹਰਾਂ ਅਤੇ ਪੈਸੇ ਵੀ ਬਰਾਮਦ ਹੋ ਸਕਦੇ ਹਨ ਕਿਉਂਕਿ ਇਸ ਔਰਤ ਨੇ ਕਰੋੜਾਂ ਰੁਪਏ ਦੀ ਠੱਗੀ ਮਾਰੀ ਹੈ।
