ਬਰਨਾਲਾ, 21 ਅਕਤੂਬਰ (ਨਿਰਮਲ ਸਿੰਘ ਪੰਡੋਰੀ )- ਨਗਰ ਕੌਂਸਲ ਬਰਨਾਲਾ ਇੱਕ ਵਾਰ ਫੇਰ ਗੰਭੀਰ ਸਵਾਲਾਂ ਦੇ ਘੇਰੇ ਵਿੱਚ ਹੈ। ਬਰਨਾਲਾ ਪੁਲਿਸ ਨੇ ਇੱਕ ਅਜਿਹੇ ਵਿਅਕਤੀ ਉੱਪਰ ਗਊਆਂ ਦੀ ਸਮਗਲਿੰਗ ਦਾ ਮਾਮਲਾ ਦਰਜ ਕੀਤਾ ਜਿਸ ਨੂੰ ਨਗਰ ਕੌਂਸਲ ਨੇ ਸ਼ਹਿਰ ਵਿੱਚੋਂ ਗਊਆਂ ਫੜ ਕੇ ਸਰਕਾਰੀ ਗਊਸ਼ਾਲਾ ਮਨਾਲ ਵਿਖੇ ਛੱਡਣ ਦਾ ਠੇਕਾ ਦਿੱਤਾ ਹੈ। ਥਾਣਾ ਠੁੱਲੀਵਾਲ ਵਿਖੇ ਜਗਸੀਰ ਸਿੰਘ ਗੋਲਾ ਵਾਸੀ ਰਾਏਕੋਟ ਅਤੇ ਕਾਕਾ ਸਲੀਮ ਵਾਸੀ ਜਮਾਲਪੁਰ ਮਲੇਰਕੋਟਲਾ, ਨੂਰ ਜਮਾਲ ਵਾਸੀ ਮੋਮਨਾਬਾਦ, ਤੇਜੀ ਵਾਸੀ ਟਿੱਬਾ, ਗੁਗਨੀ ਵਾਸੀ ਧੌਲਾ ਖਿਲਾਫ ਵੱਖ-ਵੱਖ ਧਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। ਇਹਨਾਂ ਵਿੱਚੋਂ ਜਗਸੀਰ ਸਿੰਘ ਗੋਲਾ ਵਾਸੀ ਰਾਏਕੋਟ ਨੂੰ ਨਗਰ ਕੌਂਸਲ ਬਰਨਾਲਾ ਨੇ ਸ਼ਹਿਰ ਬਰਨਾਲਾ ਵਿੱਚੋਂ ਸੜਕਾਂ ‘ਤੇ ਫਿਰਦੀਆਂ ਗਊਆਂ ਫੜ ਕੇ ਸਰਕਾਰੀ ਗਊਸ਼ਾਲਾ ਮਨਾਲ ਵਿਖੇ ਭੇਜਣ ਦਾ ਠੇਕਾ ਦਿੱਤਾ ਹੋਇਆ ਹੈ। ਗਿਰੋਹ ਦੇ ਮੁੱਖ ਸਰਗਨਾ ਕਾਕਾ ਸਲੀਮ ਵਾਸੀ ਮਲੇਰਕੋਟਲਾ ਹੈ। ਜਿਸ ‘ਤੇ ਪਹਿਲਾਂ ਵੀ ਗਊਆਂ ਦੀ ਕੱਟ ਵੱਢ ਅਤੇ ਸਮਗਲਿੰਗ ਦੇ ਮਾਮਲੇ ਦਰਜ ਹਨ। ਨਗਰ ਕੌਂਸਲ ਬਰਨਾਲਾ ਦੀ ਕਾਰਜਕਾਰੀ ‘ਤੇ ਸਵਾਲ ਉੱਠਦੇ ਹਨ ਕਿ ਉਸਨੇ ਇੱਕ ਅਜਿਹੇ ਗਿਰੋਹ ਦੇ ਮੈਂਬਰ ਨੂੰ ਗਊਆਂ ਫੜਨ ਦਾ ਠੇਕਾ ਦੇ ਦਿੱਤਾ ਜਿਸ ਉਪਰ ਪਹਿਲਾਂ ਵੀ ਗਾਵਾਂ ਦੀ ਸਮਗਲਿੰਗ ਦੇ ਮਾਮਲੇ ਦਰਜ ਹਨ । ਸਵਾਲ ਇਹ ਵੀ ਹਨ ਕਿ ਕੀ ਨਗਰ ਕੌਂਸਲ ਨੇ ਉਕਤ ਵਿਅਕਤੀ ਨੂੰ ਗਊਆਂ ਫੜਨ ਦਾ ਠੇਕਾ ਦੇਣ ਤੋਂ ਪਹਿਲਾਂ ਉਸਦੇ ਚਾਲ-ਚਲਣ ਦੀ ਖੁਦ ਵੈਰੀਫਿਕੇਸ਼ਨ ਕੀਤੀ ਜਾਂ ਪੁਲਿਸ ਤੋਂ ਉਸ ਸਬੰਧੀ ਕੋਈ ਜਾਣਕਾਰੀ ਪ੍ਰਾਪਤ ਕੀਤੀ ? ਇਸ ਮਾਮਲੇ ਸਬੰਧੀ ਵਧੇਰੇ ਜਾਣਕਾਰੀ ਦਿੰਦੇ ਹੋਏ ਗਊ ਰਕਸ਼ਾ ਦਲ ਦੇ ਪੰਜਾਬ ਪ੍ਰਧਾਨ ਸੰਦੀਪ ਕੁਮਾਰ ਵਰਮਾ ਨੇ ਦੱਸਿਆ ਕਿ “ਸਾਨੂੰ ਗੁਪਤ ਸੂਚਨਾ ਮਿਲੀ ਕਿ ਪਿਛਲੇ ਲੰਮੇ ਸਮੇਂ ਤੋਂ ਪਿੰਡ ਭੱਦਲਵੱਡ ਦੇ ਵਿੱਚ ਇੱਕ ਪਲਾਟ ਨੂੰ ਚਾਰਦੀਵਾਰੀ ਕੀਤੀ ਹੋਈ ਹੈ। ਜਿਸ ਵਿੱਚ ਬੇਸਹਾਰਾ ਗਊਆਂ ਨੂੰ ਤਾੜ ਕੇ ਕਈ ਕਈ ਦਿਨ ਭੁੱਖਾ ਪਿਆਸਾ ਰੱਖਿਆ ਜਾਂਦਾ ਹੈ ਅਤੇ ਬਾਅਦ ‘ਚ ਟਰੱਕ ਵਿੱਚ ਬੰਨ੍ਹ ਨੂੜ ਕੇ ਲੋਡ ਕਰਕੇ ਪੰਜਾਬ ਤੋਂ ਬਾਹਰਲੇ ਸੂਬਿਆਂ ਵਿੱਚ ਕੱਟਣ ਵੱਢਣ ਦੇ ਮਕਸਦ ਨਾਲ ਭੇਜਿਆ ਜਾਂਦਾ ਹੈ। ਵਰਮਾ ਨੇ ਦੱਸਿਆ ਕਿ ਇਸ ਦੀ ਇਤਲਾਹ ਐਸ.ਐਸ.ਪੀ ਬਰਨਾਲਾ ਨੂੰ ਦਿੱਤੀ ਗਈ ਜਿਸ ਤੋਂ ਬਾਅਦ ਘਟਨਾ ਸਥਾਨ ‘ਤੇ ਪਹੁੰਚੇ ਥਾਣਾ ਠੁੱਲੀਵਾਲ ਦੇ ਐਸ.ਐਚ.ਓ ਬਲਦੇਵ ਸਿੰਘ ਦੀ ਮੌਜੂਦਗੀ ਵਿੱਚ ਇਕ ਚਾਰਦੀਵਾਰੀ ਵਾਲੇ ਪਲਾਟ ਨੂੰ ਚੈੱਕ ਕੀਤਾ ਤਾਂ ਦੇਖਿਆ ਕਿ 9 ਗਊਵੰਸ਼ਾਂ ਦੇ ਮੂੰਹ ਬੰਨ੍ਹ ਕੇ ਬੰਨਿਆ ਹੋਇਆ ਸੀ,ਜਿਨਾਂ ਨੂੰ ਆਜ਼ਾਦ ਕਰਕੇ ਸਰਕਾਰੀ ਗਊਸ਼ਾਲਾ ਮਨਾਲ ਵਿਖੇ ਛੱਡਿਆ ਗਿਆ । ਥਾਣਾ ਠੁੱਲੀਵਾਲ ਦੀ ਪੁਲਿਸ ਨੇ ਸੰਦੀਪ ਵਰਮਾ ਦੇ ਬਿਆਨਾਂ ਦੇ ਆਧਾਰ ‘ਤੇ ਉਹ ਕਿਤੇ ਗਿਰੋਹ ਦੇ ਖਿਲਾਫ ਮਾਮਲਾ ਦਰਜ ਕਰਕੇ ਦੋਸੀਆਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਇਸ ਮਾਮਲੇ ਵਿੱਚ ਸਿਰਫ਼ ਨਗਰ ਕੌਂਸਲ ਹੀ ਨਹੀਂ ਬਲਕਿ ਜ਼ਿਲ੍ਹਾ ਪ੍ਰਸ਼ਾਸਨ ਵੀ ਸਵਾਲਾਂ ਦੇ ਘੇਰੇ ਵਿੱਚ ਹੈ ਕਿਉਂਕਿ ਇਹ ਸਾਰੀ ਕਾਰਵਾਈ ਨਗਰ ਕੌਂਸਲ ਵੱਲੋਂ ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਹੁਕਮਾਂ ‘ਤੇ ਹੀ ਕੀਤੀ ਜਾ ਰਹੀ ਹੈ। ਜ਼ਿਲ੍ਹੇ ਦੇ ਉੱਚ ਅਧਿਕਾਰੀਆਂ ਸਮੇਤ ਨਗਰ ਕੌਂਸਲ ਦੇ ਅਧਿਕਾਰੀਆਂ ਨੂੰ ਇਹ ਬਾਖੂਬੀ ਪਤਾ ਹੈ ਕਿ ਗਾਂ ਨੂੰ ਹਿੰਦੂ ਧਰਮ ਅਨੁਸਾਰ ਪਵਿੱਤਰ ਦਰਜਾ ਪ੍ਰਾਪਤ ਹੈ, ਫੇਰ ਬਰਨਾਲਾ ਸ਼ਹਿਰ ਵਿੱਚ ਸੜਕਾਂ ‘ਤੇ ਫਿਰਦੀਆਂ ਗਾਵਾਂ ਨੂੰ ਸਰਕਾਰੀ ਗਊਸ਼ਾਲਾ ਵਿੱਚ ਛੱਡਣ ਦਾ ਠੇਕਾ ਦੇਣ ਵਿੱਚ ਕੁਤਾਹੀ ਕਿਵੇਂ ਹੋਈ ?
Menu
