-ਪਿੰਡ ਦੇ ਸਾਂਝੇ ਕੰਮ ਖ਼ਾਤਰ ਵੀ ਨਹੀਂ ਹੋ ਰਹੀ ਸੁਣਵਾਈ-ਵਰਕਰ
ਬਰਨਾਲਾ 15 ਅਪ੍ਰੈਲ ( ਨਿਰਮਲ ਸਿੰਘ ਪੰਡੋਰੀ)-ਪਿੰਡ ਦੇ ਇੱਕ ਸਾਂਝੇ ਕੰਮ ਦੀ ਖ਼ਾਤਰ ਹਲਕਾ ਵਿਧਾਇਕ ਨੂੰ ਮਿਲਣ ਤੋਂ ਬਾਅਦ ਵੀ ਜਦੋਂ ਕਿਸੇ ਅਫ਼ਸਰ ਨੇ ਗੱਲ ਨਾ ਸੁਣੀ ਤਾਂ “ਆਪ” ਦੇ ਇੱਕ ਟਕਸਾਲੀ ਵਰਕਰ ਨੇ ਨਿਰਾਸ਼ ਹੋ ਕੇ ਆਪਣੇ ਘਰ ਪਏ ਪਾਰਟੀ ਦੇ ਝੰਡੇ ਅਤੇ ਹੋਰ ਸਮਾਨ ਹਲਕਾ ਵਿਧਾਇਕ ਨੂੰ ਮੋੜਨ ਦਾ ਮਨ ਬਣਾ ਲਿਆ । ਵਿਧਾਨ ਸਭਾ ਹਲਕਾ ਮਹਿਲ ਕਲਾਂ ਦੇ ਪਿੰਡ ਸਹਿਜੜਾ ਦੇ ਵਸਨੀਕ ਅਤੇ 2013 ਤੋਂ ਆਮ ਆਦਮੀ ਪਾਰਟੀ ਨਾਲ ਜੁੜੇ ਵਰਕਰ ਮੇਜਰ ਸਿੰਘ ਨੇ ਦੱਸਿਆ ਕਿ ਪਿੰਡ ਦੀ ਸ਼ਾਮਲਾਟ ਜਗ੍ਹਾ ਉਪਰ ਕੁਝ ਲੋਕਾਂ ਵੱਲੋਂ ਨਜਾਇਜ਼ ਕਬਜ਼ੇ ਸਬੰਧੀ ਉਸ ਨੇ ਬੀਡੀਪੀਓ ਤੋਂ ਲੈ ਕੇ ਡੀਸੀ ਤੱਕ ਦਰਖ਼ਾਸਤਾਂ ਦਿੱਤੀਆਂ ਪ੍ਰੰਤੂ ਕੋਈ ਗੱਲ ਨਹੀਂ ਸੁਣ ਰਿਹਾ । ਮੇਜਰ ਸਿੰਘ ਨੇ ਕਿਹਾ ਕਿ ਉਹਨਾਂ ਨੇ ਇਹ ਮਸਲਾ ਕਈ ਵਾਰ ਹਲਕਾ ਵਿਧਾਇਕ ਦੇ ਧਿਆਨ ਵਿੱਚ ਵੀ ਲਿਆਂਦਾ ਪ੍ਰੰਤੂ ਕੋਈ ਗੱਲ ਨਹੀਂ ਬਣੀ । ਉਹਨਾਂ ਦੱਸਿਆ ਕਿ ਅਕਾਲੀ-ਭਾਜਪਾ ਸਰਕਾਰ ਮੌਕੇ ਆਮ ਆਦਮੀ ਪਾਰਟੀ ਦਾ ਪ੍ਰਚਾਰ ਕਰਨ ਬਦਲੇ ਉਸ ਨੂੰ ਧਮਕੀਆਂ ਵੀ ਦਿੱਤੀਆਂ ਜਾਂਦੀਆਂ ਰਹੀਆਂ ਅਤੇ ਇੱਕ ਝੂਠਾ ਮੁਕੱਦਮਾ ਵੀ ਉਸ ਉਪਰ ਦਰਜ ਕਰਵਾਇਆ ਗਿਆ ਸੀ ਪ੍ਰੰਤੂ ਉਹ ਡਰਿਆ ਨਹੀ ਅਤੇ ਉਸਨੇ ਝਾੜੂ ਨਹੀਂ ਛੱਡਿਆ ਤੇ ਅੱਜ ਤੱਕ ਉਹ ਪਾਰਟੀ ਦਾ ਵਰਕਰ ਬਣਿਆ ਹੋਇਆ ਹੈ ਪ੍ਰੰਤੂ ਹੁਣ ਜਦੋਂ ਪਿੰਡ ਦੇ ਸਾਂਝੇ ਕੰਮਾਂ ਖਾਤਰ ਵੀ ਕਿਧਰੇ ਕੋਈ ਸੁਣਵਾਈ ਨਹੀਂ ਹੋ ਰਹੀ ਤਾਂ ਉਸ ਦਾ ਮਨ ਦੁਖੀ ਹੈ ਅਤੇ ਉਸ ਨੇ ਪਾਰਟੀ ਦੇ ਹਲਕਾ ਵਿਧਾਇਕ ਨੂੰ ਸਤਿਕਾਰ ਸਹਿਤ ਝੰਡੇ ਵਾਪਸ ਕਰਨ ਦਾ ਮਨ ਬਣਾਇਆ ਹੈ । ਮੇਜਰ ਸਿੰਘ ਨੇ ਇਹ ਵੀ ਕਿਹਾ ਕਿ ਉਸਨੇ 2014 ਦੀਆਂ ਲੋਕ ਸਭਾ ਚੋਣਾਂ ਤੋਂ ਲੈ ਕੇ ਹੁਣ ਤੱਕ ਚੋਣਾਂ ਦੇ ਵਿਚ ਆਪਣੇ ਵਿਤ ਮੁਤਾਬਕ ਫੰਡ ਵੀ ਦਿੱਤਾ ਅਤੇ ਪਾਰਟੀ ਦੀਆਂ ਪਿੰਡ ਵਿਚੋਂ ਪਰਚੀਆਂ ਵੀ ਕੱਟੀਆਂ ਪ੍ਰੰਤੂ ਹੁਣ ਸਾਰੇ ਪਿੰਡ ਦਾ ਸਾਂਝੇ ਮਸਲੇ ਦੇ ਮਾਮਲੇ ਵਿੱਚ ਵੀ ਉਸ ਦੀ ਗੱਲ ਨਹੀਂ ਸੁਣੀ ਜਾ ਰਹੀ । ਮੇਜਰ ਸਿੰਘ ਨੇ ਕਿਹਾ ਕਿ ਅਸਲ ਵਿੱਚ ਕੁਝ ਵੀ ਨਹੀ ਬਦਲਿਆ ਸਾਰਾ ਕੁਝ ਪਹਿਲਾਂ ਵਰਗਾ ਹੀ ਹੈ । ਉਨ੍ਹਾਂ ਕਿਹਾ ਕਿ ਉਹ ਆਪਣੇ ਘਰ ਸੰਭਾਲ ਕੇ ਰੱਖੇ ਪਾਰਟੀ ਦੇ ਝੰਡੇ ਅਤੇ ਹੋਰ ਸਮਾਨ ਹਲਕਾ ਵਿਧਾਇਕ ਦੇ ਘਰ ਜਾ ਕੇ ਮੋੜ ਕੇ ਆਵੇਗਾ ਅਤੇ ਪਿੰਡ ਦੀ ਸਾਂਝੀ ਜਗ੍ਹਾ ਤੋਂ ਨਾਜਾਇਜ਼ ਕਬਜ਼ਾ ਛੁਡਾਉਣ ਲਈ ਕਨੂੰਨੀ ਲੜਾਈ ਲੜੇਗਾ ।
