ਚੰਡੀਗੜ੍ਹ, 1 ਜਨਵਰੀ, Gee98 news service
-ਭਾਵੇਂ ਕਿ ਲਾਲਚ ਦਾ ਚਾਰੇ ਪਾਸੇ ਬੋਲਬਾਲਾ ਹੈ ਫਿਰ ਵੀ ਇਮਾਨਦਾਰੀ ਦੀ ਇੱਕ ਮਿਸਾਲ ਲਾਲਚ ਦੀਆਂ ਭਾਵਨਾਵਾਂ ਨੂੰ ਦੱਬ ਲੈਂਦੀ ਹੈ ਅਤੇ ਲੋਕਾਂ ਨੂੰ ਇਮਾਨਦਾਰੀ ‘ਤੇ ਚੱਲਣ ਦੀ ਪ੍ਰੇਰਨਾ ਦਿੰਦੀ ਹੈ। ਇਮਾਨਦਾਰੀ ਦੀ ਅਜਿਹੀ ਇਕ ਮਿਸਾਲ ਕੈਨੇਡਾ ਦੇ ਇੱਕ ਪੰਜਾਬੀ ਟਰੱਕ ਡਰਾਈਵਰ ਨੇ ਪੇਸ਼ ਕੀਤੀ ਹੈ ਜਿਸ ਦੀ ਦੁਨੀਆਂ ਭਰ ਵਿੱਚ ਪ੍ਰਸ਼ੰਸਾ ਹੋ ਰਹੀ ਹੈ। ਕਰੀਬ 34 ਕੁ ਸਾਲ ਦੀ ਉਮਰ ਦਾ ਪੰਜਾਬੀ ਟਰੱਕ ਡਰਾਈਵਰ ਦਲਜੀਤ ਸਿੰਘ ਸੋਹੀ ਕੈਲਗਰੀ ‘ਚ ਰਹਿੰਦਾ ਹੈ ਅਤੇ ਇੱਕ ਐਬਟਸਫੋਰਡ-ਅਧਾਰਤ ਟਰੱਕਿੰਗ ਕੰਪਨੀ- “ਟ੍ਰਿਪਲ ਏਟ ਟ੍ਰਾਂਸਪੋਰਟ” ਲਈ ਟਰੱਕ ਚਲਾਉਂਦਾ ਹੈ। ਇਹ ਕੰਪਨੀ ਪੱਛਮੀ ਕੈਨੇਡਾ ਵਿੱਚ ਲੰਬੀ ਦੂਰੀ ਦੇ ਰੂਟਾਂ ‘ਚ ਮਸ਼ਹੂਰ ਹੈ। ਦਲਜੀਤ ਸਿੰਘ ਸੋਹੀ ਦੀ ਇਮਾਨਦਾਰੀ ਦੀ ਕਹਾਣੀ ਅਨੁਸਾਰ ਕੈਲਗਰੀ ਤੋਂ ਐਬਟਸਫੋਰਡ ਦੀ ਯਾਤਰਾ ਦੌਰਾਨ ਦਲਜੀਤ ਸੋਹੀ ਨੇ ਬੀਸੀ ਦੇ ਕੂਟੇਨੇ ਖੇਤਰ ਦੇ ਇੱਕ ਕਸਬੇ ਗੋਲਡਨ ‘ਚ ਇੱਕ ਸੰਖੇਪ ਕੌਫੀ ਸਟਾਪ ਕੀਤਾ, ਜਦੋਂ ਉਹ ਆਪਣੇ ਟਰੱਕ ਵੱਲ ਵਾਪਸ ਜਾ ਰਿਹਾ ਸੀ ਤਾਂ ਉਸ ਨੇ ਦੇਖਿਆ ਕਿ ਪਾਰਕਿੰਗ ‘ਚ ਇੱਕ ਔਰਤ ਦਾ ਪਰਸ ਡਿੱਗ ਗਿਆ ਹੈ, ਜਿਸ ਦਾ ਉਸ ਔਰਤ ਨੂੰ ਪਤਾ ਨਹੀਂ ਲੱਗਿਆ। ਇਹ ਦੇਖਦੇ ਹੀ ਦਲਜੀਤ ਸੋਹੀ ਤੁਰੰਤ ਮਦਦ ਲਈ ਅੱਗੇ ਆਇਆ।ਸੋਹੀ ਨੇ ਤੁਰੰਤ ਉਸ ਔਰਤ ਦਾ ਪਰਸ ਚੁੱਕਿਆ ਤਾਂ ਦੇਖਿਆ ਕਿ ਪਰਸ ‘ਚ ਪੈਸੇ, ਆਈਡੀ, ਦਸਤਾਵੇਜ਼ ਅਤੇ ਇੱਕ ਸੋਨੇ ਦੀ ਚੇਨ ਸੀ ਪਰ ਉਹ ਔਰਤ ਤੁਰੰਤ ਉਥੋਂ ਰਵਾਨਾ ਹੋ ਚੁੱਕੀ ਸੀ। ਦਲਜੀਤ ਸੋਹੀ ਨੇ ਪਰਸ ਵਾਪਸ ਕਰਨ ਲਈ ਉਸ ਔਰਤ ਦਾ ਪਿੱਛਾ ਕਰਨਾ ਸ਼ੁਰੂ ਕਰ ਦਿੱਤਾ। ਦੱਸ ਦੇਈਏ ਕਿ ਸੋਹੀ ਨੇ ਉਸ ਔਰਤ ਦਾ ਤਿੰਨ ਘੰਟੇ ਤੱਕ ਪਿੱਛਾ ਕੀਤਾ। ਉਹ ਔਰਤ ਆਪਣੇ ਪਰਿਵਾਰ ਨੂੰ ਮਿਲਣ ਲਈ ਸੈਲਮਨ ਆਰਮ ਜਾ ਰਹੀ ਸੀ। ਔਰਤ ਨੇ ਦੇਖ ਲਿਆ ਸੀ ਕਿ ਇੱਕ ਟਰੱਕ ਉਸ ਦਾ ਪਿੱਛਾ ਕਰ ਰਿਹਾ ਹੈ ਪਰ ਉਹ ਸਥਿਤੀ ਤੋਂ ਅਣਜਾਣ ਸੀ ਅਤੇ ਇੱਕ ਟਰੱਕ ਨੂੰ ਉਸਦੇ ਮਗਰ ਆਉਂਦਿਆਂ ਦੇਖ ਕੇ ਉਹ ਚਿੰਤਤ ਹੋ ਗਈ ਸੀ। ਸੋਹੀ ਨੇ ਉਸ ਔਰਤ ਨੂੰ ਕਈ ਹਿੰਟ ਦੇਣ ਦੀ ਵੀ ਕੋਸ਼ਿਸ਼ ਕੀਤੀ ਪਰ ਔਰਤ ਸਮਝ ਨਹੀਂ ਪਾਈ। ਆਖਰਕਾਰ ਜਦੋਂ ਉਹ ਔਰਤ ਸਿਕਾਮੌਸ ਦੇ ਇੱਕ ਗੈਸ ਸਟੇਸ਼ਨ ‘ਤੇ ਰੁਕੀ, ਸੋਹੀ ਨੇ ਉਸ ਕੋਲ ਪਹੁੰਚ ਕੇ ਪਰਸ ਵਾਪਸ ਕਰ ਦਿੱਤਾ। ਸ਼ੁਕਰਗੁਜ਼ਾਰ ਹੋ ਕੇ ਔਰਤ ਨੇ ਉਸਨੂੰ $500 ਨਕਦ ਇਨਾਮ ਦੀ ਪੇਸ਼ਕਸ਼ ਕੀਤੀ, ਪਰ ਸੋਹੀ ਨੇ ਇਨਕਾਰ ਕਰ ਦਿੱਤਾ। ਸੋਹੀ ਨੇ ਉਸ ਔਰਤ ਨੂੰ ਆਪਣਾ ਨਾਮ ਵੀ ਨਹੀਂ ਦੱਸਿਆ ਪਰ ਔਰਤ ਨੇ ਟਰੱਕ ‘ਤੇ ਟ੍ਰੇਲਰ ਨੰਬਰ ਦੀ ਵਰਤੋਂ ਕਰਕੇ ਉਸਨੂੰ ਟਰੈਕ ਕੀਤਾ ਅਤੇ ਟ੍ਰਿਪਲ ਏਟ ਟ੍ਰਾਂਸਪੋਰਟ ‘ਤੇ ਪਹੁੰਚ ਗਈ। ਉਸ ਔਰਤ ਨੇ ਸੋਹੀ ਨੂੰ ਧੰਨਵਾਦ ਪ੍ਰਗਟ ਕਰਨ ਲਈ ਇੱਕ ਆਈਫੋਨ ਅਤੇ ਇੱਕ ਨੋਟ ਭੇਜਿਆ। ਟ੍ਰਿਪਲ ਏਟ ਟਰਾਂਸਪੋਰਟ ਦੇ ਸੁਰੱਖਿਆ ਅਤੇ ਪਾਲਣਾ ਸੁਪਰਵਾਈਜ਼ਰ ਪਲਵਿੰਦਰ ਸਿੰਘ ਨੇ ਕਿਹਾ ਕਿ ਦਲਜੀਤ ਸੋਹੀ ਨੇ ਜੋ ਕੀਤਾ ਉਸ ਤੋਂ ਹਰ ਕੋਈ ਬਹੁਤ ਖੁਸ਼ ਸੀ। ਸੋਹੀ, ਜੋ ਕਿ 2021 ਤੋਂ ਕੰਪਨੀ ਦੇ ਨਾਲ ਹੈ, ਨੇ ਕੰਮ ‘ਤੇ ਕਿਸੇ ਨੂੰ ਵੀ ਨਹੀਂ ਦੱਸਿਆ ਕਿ ਕੀ ਹੋਇਆ ਹੈ, ਇੱਥੋਂ ਤੱਕ ਕਿ ਉਸਦੇ ਪਰਿਵਾਰ ਨੂੰ ਵੀ ਨਹੀਂ ਦੱਸਿਆ। ਟ੍ਰਿਪਲ ਏਟ ਟ੍ਰਾਂਸਪੋਰਟ ਦੇ ਐੱਚਆਰ ਮੈਨੇਜਰ ਹਰਪ੍ਰੀਤ ਸੱਭਰਵਾਲ ਨੇ ਸੋਹੀ ਦੀ ਨਿਮਰਤਾ ਦੀ ਸ਼ਲਾਘਾ ਕੀਤੀ। ਕੰਪਨੀ ਨੇ ਬਾਅਦ ‘ਚ ਸੋਹੀ ਦੇ ਇਸ ਨੇਕ ਕੰਮ ਦੀ ਸ਼ਲਾਘਾ ਕਰਨ ਲਈ ਆਪਣੇ ਐਬਟਸਫੋਰਡ ਦਫਤਰ ‘ਚ ਇੱਕ ਹੈਰਾਨੀਜਨਕ ਸਮਾਗਮ ਦਾ ਆਯੋਜਨ ਕੀਤਾ। ਦੱਸ ਦੇਈਏ ਕਿ ਹੁਣ ਦਲਜੀਤ ਸੋਹੀ ਨੂੰ ਟਰੱਕਲੋਡ ਕੈਰੀਅਰਜ਼ ਐਸੋਸੀਏਸ਼ਨ ਦੇ “ਹਾਈਵੇ ਐਂਜਲ ਐਵਾਰਡ” ਲਈ ਨਾਮਜ਼ਦ ਕੀਤਾ ਗਿਆ ਹੈ। ਇੱਕ ਟਰੱਕ ਡਰਾਈਵਰ ਦੀ ਇਮਾਨਦਾਰੀ ਦੀ ਇਹ ਕਹਾਣੀ ਕੈਨੇਡਾ ਤੋਂ ਸਾਰੀ ਦੁਨੀਆਂ ਵਿੱਚ ਵਾਇਰਲ ਹੋ ਰਹੀ ਹੈ ਤੇ ਹਰ ਕੋਈ ਇਸਦੀ ਪ੍ਰਸੰਸਾ ਕਰ ਰਿਹਾ ਹੈ। ਆਓ ! ਨਵੇਂ ਵਰ੍ਹੇ ਦੀ ਪਹਿਲੀ ਸਵੇਰ ਆਪਾਂ ਵੀ ਇਮਾਨਦਾਰੀ ਦੇ ਰਸਤੇ ‘ਤੇ ਚੱਲਣ ਦਾ ਪ੍ਰਣ ਕਰੀਏ।
