ਬਰਨਾਲਾ, 01 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ) :
ਸਿੱਖ ਪੰਥ ਦੇ ਵਿਦਵਾਨ ਡਾ. ਰਾਜਵਿੰਦਰ ਸਿੰਘ ਜੋਗਾ (ਰੀਸਰਚ ਸਕਾਲਰ ਸਿੱਖ ਇਤਿਹਾਸ ਰੀਸਰਚ ਬੋਰਡ, ਸ਼ੋ੍ਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ) ਨੇ ਸਿੱਖੀ ਦੇ ਪ੍ਰਚਾਰ ਵਿੱਚ ਅਹਿਮ ਭੂਮਿਕਾ ਨਿਭਾਉਣ ਵਾਲੇ ਸਰਦਾਰ ਅਵਤਾਰ ਸਿੰਘ ਪਟਵਾਰੀ ਦਾ ਉਨ੍ਹਾਂ ਦੀ ਸਥਾਨਕ ਰਿਹਾਇਸ਼ ’ਤੇ ਪੁੱਜ ਕੇ ਵਿਸ਼ੇਸ਼ ਸਨਮਾਨ ਕੀਤਾ। ਜ਼ਿਕਰਯੋਗ ਹੈ ਕਿ ਡਾ. ਰਾਜਵਿੰਦਰ ਸਿੰਘ ਜੋਗਾ, ਗਿਆਨੀ ਮੇਵਾ ਸਿੰਘ ਭਿੰਡਰਾਂਵਾਲਿਆ ਦੇ ਜੀਵਨ ਸੰਬੰਧੀ ਖੋਜ ਕਰ ਰਹੇ ਹਨ ਅਤੇ ਅਵਤਾਰ ਸਿੰਘ ਪਟਵਾਰੀ ਨੇ ਲੰਮਾ ਸਮਾਂ ਗਿਆਨੀ ਮੇਵਾ ਸਿੰਘ ਨਾਲ ਧਰਮ ਪ੍ਰਚਾਰ ਕੀਤਾ। ਆਵਾਜਾਈ ਦੇ ਸਾਧਨਾਂ ਦੀ ਕਮੀ ਦੇ ਦੌਰ ’ਚ ਅਵਤਾਰ ਸਿੰਘ ਪਟਵਾਰੀ ਨੇ ਗਿਆਨੀ ਮੇਵਾ ਸਿੰਘ ਨਾਲ ਕਈ ਵਾਰ ਪੈਦਲ ਯਾਤਰਾ ਕਰਕੇ ਵੀ ਧਰਮ ਪ੍ਰਚਾਰ ਦੇ ਕਾਰਜ ਕੀਤੇ। ਗਿਆਨੀ ਮੇਵਾ ਸਿੰਘ ਦੇ ਜੀਵਨ ਸੰਬੰਧੀ ਖੋਜ ਕਾਰਜ ਦੌਰਾਨ ਡਾ. ਜੋਗਾ , ਅਵਤਾਰ ਸਿੰਘ ਪਟਵਾਰੀ ਦੀ ਸਥਾਨਕ ਰਿਹਾਇਸ਼ ’ਤੇ ਉੱਚੇਚੇ ਤੌਰ ’ਤੇ ਗਿਆਨੀ ਮੇਵਾ ਸਿੰਘ ਸੰਬੰਧੀ ਵਡਮੁੱਲੀ ਜਾਣਕਾਰੀ ਇਕੱਤਰ ਕਰਨ ਪੁੱਜੇ। ਇਸ ਮੌਕੇ ਡਾ. ਰਾਜਵਿੰਦਰ ਸਿੰਘ ਜੋਗਾ ਨੇ ਅਵਤਾਰ ਸਿੰਘ ਪਟਵਾਰੀ ਵੱਲੋਂ ਧਰਮ ਪ੍ਰਚਾਰ ਹਿੱਤ ਕੀਤੇ ਕਾਰਜਾਂ ਲਈ ਆਪਣੀਆਂ ਹੱਥ ਲਿਖਤ ਧਾਰਮਿਕ ਪੁਸਤਕਾਂ ਭੇਂਟ ਕਰਦੇ ਹੋਏ ਅਵਤਾਰ ਸਿੰਘ ਪਟਵਾਰੀ ਅਤੇ ਉਨ੍ਹਾਂ ਦੀ ਧਰਮ ਪਤਨੀ ਬੀਬੀ ਗੁਰਵੀਰ ਕੌਰ ਦਾ ਸਨਮਾਨ ਵੀ ਕੀਤਾ।
