ਬਰਨਾਲਾ 16 ਅਕਤੂਬਰ (ਨਿਰਮਲ ਸਿੰਘ ਪੰਡੋਰੀ)-
ਕੌਮਾਂਤਰੀ ਭੁੱਖ ਸੂਚਕ ਅੰਕ 2022 ਦੀ ਰਿਪੋਰਟ ਭਾਰਤ ਲਈ ਨਮੋਸ਼ੀਜਨਕ ਸਥਿਤੀ ਵਾਲੀ ਹੈ । ਭੁੱਖਮਰੀ ਦੇ ਮਾਮਲੇ ‘ਚ ਭਾਰਤ 121 ਦੇਸ਼ਾਂ ਵਿੱਚੋਂ 107ਵੇਂ ਸਥਾਨ ‘ਤੇ ਹੈ । ਇਨ੍ਹਾਂ ਅੰਕੜਿਆਂ ਉੱਪਰ ਕਾਂਗਰਸੀ ਆਗੂ ਨੇ ਟਿੱਪਣੀ ਕੀਤੀ ਹੈ ਕਿ “ਅੱਛੇ ਦਿਨਾਂ” ਦੀ ਇਸ ਤੋਂ ਵਧੀਆ ਮਿਸਾਲ ਹੋਰ ਕੀ ਹੋ ਸਕਦੀ ਹੈ, ਉਂਜ ਇਹ ਅੰਕੜੇ ਧਿਆਨ ਮੰਗਦੇ ਹਨ ਅਤੇ ਭੁੱਖਮਰੀ ਸਬੰਧੀ ਗੰਭੀਰ ਸਥਿਤੀ ਵਾਲੇ ਹਨ । ਇਹ ਅੰਕੜੇ ਭਾਰਤ ਲਈ ਨਮੋਸ਼ੀਜਨਕ ਇਸ ਕਰਕੇ ਵੀ ਹਨ ਕਿਉਂਕਿ ਪਾਕਿਸਤਾਨ, ਬੰਗਲਾਦੇਸ਼, ਨੇਪਾਲ, ਸ੍ਰੀਲੰਕਾ, ਭਾਰਤ ਨਾਲੋਂ ਚੰਗੀ ਸਥਿਤੀ ਵਿੱਚ ਹਨ । ਧਿਆਨ ਰਹੇ ਕਿ ਪਿਛਲੇ ਸਾਲ ਭਾਰਤ ਇਨ੍ਹਾਂ ਅੰਕੜਿਆਂ ‘ਚ 116 ਦੇਸ਼ਾਂ ਵਿਚੋਂ 101ਵੇਂ ਨੰਬਰ ‘ਤੇ ਸੀ ਜਦਕਿ 2020 ‘ਚ 94ਵੇਂ ਨੰਬਰ ‘ਤੇ ਸੀ । ਸਭ ਤੋਂ ਵੱਧ ਭੁੱਖ ਪ੍ਰਭਾਵਿਤ ਖੇਤਰਾਂ ਸਬੰਧੀ ਇਨ੍ਹਾਂ ਅੰਕੜਿਆਂ ਨੇ ਵਿਰੋਧੀ ਪਾਰਟੀਆਂ ਨੂੰ ਭਾਜਪਾ ਨੂੰ ਘੇਰਨ ਦਾ ਇੱਕ ਮੁੱਦਾ ਦੇ ਦਿੱਤਾ ਹੈ ਕਿਉਂਕਿ “ਅੱਛੇ ਦਿਨ ਅਤੇ ਨਵਾਂ ਭਾਰਤ” ਭਾਜਪਾ ਦੇ ਮੁੱਖ ਨਾਅਰੇ ਹਨ ਪ੍ਰੰਤੂ ਕੌਮਾਂਤਰੀ ਭੁੱਖ ਸੂਚਕ ਅੰਕ 2022 ਨੇ ਭਾਜਪਾ ਨੂੰ ਸਵਾਲਾਂ ਦੇ ਘੇਰੇ ‘ਚ ਖੜ੍ਹਾ ਕੀਤਾ ਹੈ। ਦੂਜੇ ਪਾਸੇ ਕੁਪੋਸ਼ਣ ਦੇ ਮਾਮਲੇ ਵਿੱਚ ਵੀ ਭਾਰਤ ਦੀ ਸਥਿਤੀ ਬਹੁਤੀ ਚੰਗੀ ਨਹੀਂ ਹੈ । 828 ਮਿਲੀਅਨ ਲੋਕਾਂ ਵਿੱਚੋਂ ਭਾਰਤ ਵਿੱਚ 224 ਮਿਲੀਅਨ ਲੋਕ ਕੁਪੋਸ਼ਣ ਦਾ ਸ਼ਿਕਾਰ ਹਨ ।
ਸਬੰਧਤ ਖਬਰ
