ਏਸ਼ੀਅਨ ਨੈੱਟਬਾਲ ਚੈਂਪੀਅਨਸ਼ਿਪ ਖੇਡ ਕੇ ਪਰਤੀ ਜਸਵਿੰਦਰ ਕੌਰ ਦਾ ਨਿੱਘਾ ਸਵਾਗਤ
ਬਰਨਾਲਾ, 14 ਸਤੰਬਰ (ਮੰਗਲ ਸਿੰਘ ) :
ਸਿੰਘਾਪੁਰ ਵਿਖੇ ਏਸ਼ੀਅਨ ਨੈੱਟਬਾਲ ਚੈਂਪੀਅਨਸ਼ਿਪ ਖੇਡ ਕੇ ਪਰਤੀ ਪਿੰਡ ਧਨੌਲਾ ਖ਼ੁਰਦ ਦੀ ਹੋਣਹਾਰ ਖਿਡਾਰਨ ਜਸਵਿੰਦਰ ਕੌਰ ਆਸੂ ਦਾ ਪਿੰਡ ਵਾਸੀਆਂ ਨੇ ਨਿੱਘਾ ਸਵਾਗਤ ਕੀਤਾ। ਪੰਜਾਬ ਪੁਲਿਸ ਵਿੱਚ ਹੈੱਡਕਾਂਸਟੇਬਲ ਜਸਵਿੰਦਰ ਕੌਰ ਨੇ ਭਾਰਤੀ ਟੀਮ ਵਿੱਚ ਵਾਈਸ ਕੈਪਟਨ ਵਜੋ ਪ੍ਰਤੀਨਿਧਤਾ ਕੀਤੀ ਅਤੇ ਸੋਨੇ ਦਾ ਤਗਮਾ ਜਿੱਤਿਆ। ਜਸਵਿੰਦਰ ਕੌਰ ਭਾਰਤੀ ਟੀਮ ਵਿੱਚ ਪੰਜਾਬ ਦੀ ਇਕਲੌਤੀ ਖਿਡਾਰਨ ਹੈ ਜੋ ਨੈੱਟਬਾਲ ਫੈਡਰੇਸ਼ਨ ਆੱਫ ਇੰਡੀਆ ਵੱਲੋਂ ਕੌਮਾਂਤਰੀ ਨੈੱਟਬਾਲ ਟੀਮ ’ਚ ਚੁਣੀ ਗਈ ਹੈ। ਜ਼ਿਕਰਯੋਗ ਹੈ ਕਿ ਨੈੱਟਬਾਲ ਦੀ ਮੁੱਢਲੀ ਸਿਖਲਾਈ ’ਚ ਜਸਵਿੰਦਰ ਕੌਰ ਲਈ ਸਬ- ਇੰਸਪੈਕਟਰ ਗੁਰਮੇਲ ਸਿੰਘ ਦਾ ਵਡਮੁੱਲਾ ਯੋਗਦਾਨ ਰਿਹਾ ਹੈ। ਐਸਐਸਪੀ ਸੰਦੀਪ ਕੁਮਾਰ ਮਲਿਕ ਦੀ ਹੌਸਲਾ ਅਫਜਾਈ ਅਤੇ ਸਹਿਯੋਗ ਨੇ ਜਸਵਿੰਦਰ ਕੌਰ ਲਈ ਮਾਰਗ ਦਰਸ਼ਕ ਵੱਲੋਂ ਕੰਮ ਕੀਤਾ। ਧਨੌਲਾ ਖ਼ੁਰਦ ਦੇ ਗਰੀਬ ਪਰਿਵਾਰ ਵਿੱਚ ਜੁਗਿੰਦਰ ਸਿੰਘ ਤੇ ਗੁਰਮੀਤ ਕੌਰ ਦੇ ਘਰ ਜਨਮੀ ਜਸਵਿੰਦਰ ਕੌਰ ਦੀ ਪ੍ਰਾਪਤੀ ਨੇ ਪੰਜਾਬ ਦਾ ਨਾਮ ਰੋਸ਼ਨ ਕੀਤਾ ਹੈ, ਜਿਸ ’ਤੇ ਪਿੰਡ ਵਾਸੀ ਬਾਗੋਬਾਗ ਹਨ। ਪਿੰਡ ਵਾਸੀਆਂ ਨੇ ਜਸਵਿੰਦਰ ਕੌਰ ਨੂੰ ਹਾਰਾਂ ਨਾਲ ਲੱਦ ਕੇ ਢੋਲ ਵਜਾ ਕੇ ਪੂਰੇ ਪਿੰਡ ਦਾ ਚੱਕਰ ਲਗਾਇਆ । ਇਸ ਮੌਕੇ ਸਰਪੰਚ ਕਮਲਦੀਪ ਕੌਰ, ਗੁਰਜੀਤ ਸਿੰਘ, ਹਰਦੀਪ ਸਿੰਘ ਸਿੱਧੂ, ਟੋਨੀ ਬਾਵਾ, ਹਰਬੰਸ ਸਿੰਘ ਪੰਚ, ਕੁਲਦੀਪ ਸਿੰਘ ਧਾਲੀਵਾਲ, ਰੁਪਿੰਦਰ ਸਿੰਘ ਢਿੱਲੋਂ ਪੰਚ, ਐਸ.ਆਈ. ਗੁਰਮੇਲ ਸਿੰਘ ਹੰਡਿਆਇਆ ਤੇ ਜਸਵੀਰ ਸਿੰਘ ਜੰਟੀ ਦੋਵੇਂ ਕੋਚ, ਗੁਰਵਿੰਦਰ ਸਿੰਘ ਵਿਰਕ, ਪੰਚ ਸੰਦੀਪ ਕੌਰ, ਪੰਚ ਮਨਜੀਤ ਕੌਰ, ਨਾਜਮ ਸਿੰਘ, ਮੁਕੰਦ ਸਿੰਘ, ਜਸਮੇਲ ਸਿੰਘ ਕਾਕਾ ਅਤੇ ਪਿੰਡ ਵਾਸੀ ਹਾਜ਼ਰ ਸਨ ।
