ਬਰਨਾਲਾ, 22 ਜੂਨ (ਨਿਰਮਲ ਸਿੰਘ ਪੰਡੋਰੀ) :-
‘‘ਜੇ ਪੰਜਾਬ ਦੀ ‘ਆਪ’ ਸਰਕਾਰ ਤੋਂ ਪੰਜ ਸਾਲ ਕੰਮ ਲੈਣੇ ਹਨ ਤਾਂ ਸੰਗਰੂਰ ਦੀ ਜ਼ਿਮਨੀ ਚੋਣ ’ਚ ‘ਆਪ’ ਉਮੀਦਵਾਰ ਨੂੰ ਹਰਾ ਦੇਵੋ, ਨਹੀਂ ਤਾਂ ਪੂਰੇ ਪੰਜ ਸਾਲ ਝੂਠੀਆਂ ਗਰੰਟੀਆਂ ਤੇ ਚੁਟਕਲਿਆਂ ਤੋਂ ਬਿਨਾਂ ਹੋਰ ਕੁਝ ਨਹੀਂ ਮਿਲਣਾ’’, ਇਹ ਸ਼ਬਦ ਸ਼੍ਰੋਮਣੀ ਆਕਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੇ ਹਨ , ਜਿਨ੍ਹਾਂ ਦੀ ਵਰਤੋਂ ਪਾਰਟੀ ਉਮੀਦਵਾਰ ਬੀਬੀ ਰਾਜੋਆਣਾ ਦੀ ਚੋਣ ਮੁਹਿੰਮ ’ਚ ਹਰ ਸਟੇਜ ਤੇ ਸ. ਬਾਦਲ ਨੇ ਲੋਕਾਂ ਨੂੰ ਅਪੀਲ ਕਰਨ ਲਈ ਕੀਤੀ। ਸ. ਬਾਦਲ ਨੇ ਬੀਬੀ ਰਾਜੋਆਣਾ ਦੀ ਹਰ ਚੋਣ ਮੀਟਿੰਗ ’ਚ ਲੋਕਾਂ ਨੂੰ ਕਿਹਾ ਕਿ ‘‘ਭਗਵੰਤ ਮਾਨ ਸਰਕਾਰ ਦਾ ਗਰੂਰ ਤੋੜਨ ਲਈ ਜ਼ਿਮਨੀ ਚੋਣ ਵਿੱਚ ‘ਆਪ’ ਨੂੰ ਹਰਾਉਣਾ ਜ਼ਰੂਰੀ ਹੈ’’। ਹਰ ਸਟੇਜ ’ਤੇ ਸੁਖਬੀਰ ਸਿੰਘ ਬਾਦਲ ਲੋਕਾਂ ਨੂੰ ਇਹ ਸਿਆਸੀ ਉਲਾਂਭਾ ਵੀ ਦਿੰਦੇ ਰਹੇ ਕਿ ਲੋਕਾਂ ਨੇ ‘ਆਪ’ ਨੂੰ ਬਹੁਤ ਜ਼ਿਆਦਾ 92 ਐਮਐਲਏ ਜਿਤਾ ਦਿੱਤੇ, ਜੇਕਰ ਥੋੜੇ ਹੁੰਦੇ ਤਾਂ ਅਸੀਂ ਸੁੱਟ ਵੀ ਲੈਂਦੇ। ਬਾਦਲ ਹਰ ਸਟੇਜ ’ਤੇ ਲੋਕਾਂ ਨੂੰ ਇਹ ਚਿਤਾਵਨੀ ਵੀ ਦਿੰਦੇ ਰਹੇ ਕਿ ਜੇਕਰ ਸੰਗਰੂਰ ਤੋਂ ‘ਆਪ’ ਉਮੀਦਵਾਰ ਜਿੱਤ ਗਿਆ ਤਾਂ ਖੇਤਾਂ ਵਿੱਚ ਲੱਗੀਆਂ ਮੋਟਰਾਂ ਦਾ ਲੋਡ ਵਧਾਉਣ ਲਈ ਪੈਸੇ ਤਿਆਰ ਰੱਖਣ ਕਿਉਂਕਿ ਬਿਜਲੀ ਮੁਲਾਜ਼ਮ ਜ਼ਿਮਨੀ ਚੋਣ ਤੋਂ ਬਾਅਦ ਖੇਤਾਂ ਵਾਲੀਆਂ ਮੋਟਰਾਂ ’ਤੇ ਆ ਰਹੇ ਹਨ। ਇਹ ਪਹਿਲੀ ਵਾਰ ਦੇਖਣ ਨੂੰ ਮਿਲਿਆ ਕਿ ਕਿਸੇ ਚੋਣ ਵਿੱਚ ਵੋਟਾਂ ਮੰਗਣ ਲਈ ਸੁਖਬੀਰ ਸਿੰਘ ਬਾਦਲ ਨੇ ਮਜਾਹੀਆ ਅੰਦਾਜ਼ ਦੀ ਵਰਤੋਂ ਕੀਤੀ। ਆਮ ਤੌਰ ’ਤੇ ਸੁਖਬੀਰ ਬਾਦਲ ਦਾ ਭਾਸ਼ਣ ਸੰਜੀਦਾ ਹੁੰਦਾ ਹੈ ਪਰ ਬੀਬੀ ਰਾਜੋਆਣਾ ਦੀਆਂ ਚੋਣ ਮੀਟਿੰਗਾਂ ’ਚ ਸੁਖਬੀਰ ਬਾਦਲ ਨੇ ਭਗਵੰਤ ਮਾਨ ਵਾਲਾ ਅੰਦਾਜ਼ ਜ਼ਿਆਦਾ ਵਰਤਿਆ। ਪਿੰਡਾਂ ਦੀਆਂ ਸੱਥਾਂ ’ਚ ਸੁਖਬੀਰ ਬਾਦਲ ਦੀ ਚੋਣ ਮੀਟਿੰਗ ਖ਼ਤਮ ਹੋਣ ਤੋਂ ਬਾਅਦ ਵੀ ਲੋਕ ਸ. ਬਾਦਲ ਦੀਆਂ ਗੱਲਾਂ ਯਾਦ ਕਰਕੇ ਹੱਸਦੇ ਵੇਖੇ ਗਏ।
